Azərbaycan Sahibkarlar Konfederasiyası iş adamlarına müraciət edib.
Eləcə də bax: Gəncə İş Adamları Prezidentin çağırışına - CAVAB VERDİ
FED.az xəbər verir ki, sıralarında minlərlə iş adammını birləşdirən təşkilat sahibkarlara müraciət edərək onları aktiv olmağa, xüsusilə də işğaldan azad olunmuş ərazilərlə biznes qurmağa çağırıb.
Müraciətdə iş adamalarına xatırladılır ki, prezident İlham Əliyev Ağdam rayonuna sonuncu səfəri zamanı iş adamlarına müraciət edərək onları həm Ağdama, həm də işğaldan azad edilmiş bütün digər ərazilərə sərmayə qoymağa çağırıb.
Bundan başqa, fevralın 18-də ölkə prezidenti yeni icra başçılarının təyinatı ilə bağlı görüşdə sahibkarlara tövsiyə etdi ki, işə qəbulda, ilk növbədə, Vətən müharibəsində fərqlənmiş gənclərimizi nəzərə alsınlar.
ASK iş adamlarına bildirir ki, Qarabağa investisiya qoyulması ilə bağlı imkanlar Azərbaycan Sahibkarlar Konfederasiyasının təşkilatçılığı ilə Türk Ticarət və Sənaye Palatasına daxil olan dövlətlərin Bakıda keçirilmiş növbədənkənar görüşündə də müzakirə edilib. Həmçinin təşkilat bütün üzvlərinə müraciət edərək, şəhid ailə üzvlərinin, qazilərin işlə təminatında aktiv olmağa çağırıb. Azad olunmuş torpaqların iqtisadi cəhətdən dirçəldilməsi məqsədilə üzv şirkətlərdən toplanan investisiya layihələri hökumətə təqdim edilib.
Təşkilat bildirir ki, prezidentin bu çağırışını dəstəkləyir və öz imkanlarından istifadə edərək, azad olunmuş torpaqlarda biznesin inkişafı, mövcud layihələrə xüsusi yanaşmaların tətbiq edilməsi və sahibkarların dövlətin dəstək tədbirlərindən yararlanması üçün təşkilatı yardım göstərməyə hazırdır.
Qeyd edək ki, artıq aqrar, təhsil, emal, mədənçıxarma, ticarət, turizm sahələrini əhatə edən investisiya təklifləri mövcuddur və bundan sonra təkliflərin icra mərhələsinə keçid etmək lazımdır.
Bununla bərabər Vətən müharibəsində iştirak etmiş və fərqlənmiş gənclərimizin işlə təmin olunmaları Azərbaycan sahibkarlar Konfederasiyasının qarşısında prioritet məsələ kimi durur. Konfederasiya daima üzv olan sahibkarlara bu sahədə məsləhətlər verir və hüquqi yardım göstərir.
