Xəbər verildiyi kimi, prezident İlham Əliyev Rəqəmsal İnkişaf və Nəqliyyat Nazirliyinin tabeliyində olan Azərbaycan Yerüstü Nəqliyyat Agentliyinin fəaliyyətinin təmin edilməsi barədə fərman imzalayıb və Agentliyin nizamnaməsini təsdiqləyib.
FED.ax xəbər verir ki, nizamnaməyə əsasən Azərbaycan Yerüstü Nəqliyyat Agentliyi – AYNA ölkədə avtomobilə sərnihin və yük daşımalarına (Bakı şəhərində avtobus və taksi daşımalarından başqa) nəzarət edəcək.
Agentliyin bir neçə əsas fəaliyyət istiqaməti olacaq. Bunlar
- Nəzarət etdiyi sahədə tənzimləmə qanunvericiliyə əməl edilməsinə nəzarət,
- avtobusla müntəzəm sərnişin daşımalarını təşkil etmək və bu sahədə dövlət sifarişini formalaşdırmaq,
. avtomobillə beynəlxalq sərnişin və yük daşımalarını tənzimləyən icazə sistemini tətbiq etmək və bu sahəyə nəzarət etmək,
- rəqəmsal taxoqraf kartları üzrə milli sistemin fəaliyyətinin təmin olunmasında, habelə tənzimlənməsində və idarə olunmasında iştirak etmək.
Agentliyin vəzifələri və hüquqlarına gəlincə, onlar kifayət qədər genişdir. Belə ki, agentlik nəzarət etdiyi sahədə inzibati xəta aşkar etdikdə İnzibati Xətalar Məcəlləsinə uyğun olaraq tədbirlər görəcək, sərnişin və yük daşıyan avtomobillərin fərqlənmə nişanının olub olmamasına nəzarət edəcək.
Bundan başqa agentlik avtovağzallara (avtostansiyaya) pasport verəcək, xarici yük avtomobillərinin Azərbaycana giriş-çıxışına, yüklənmə və tranzit keçidinə icazə verəcək, xariclə avtomobil daşımaları həyata keçirmək üçün icazə blankları verəcək, eləcə də ümumi istifadədə olan avtomobil yolları ilə iri qabaritli və ağır çəkili nəqliyyat vasitələrinin hərəkətinə icazə verilməsi ilə məşğul olacaq.
Xaricə yük daşınması üçün illik v qısamüddətli icazələrin operatorlar arasında bölgüsünü və uçotunu da agentlik aparacan.
Sərnişin nəqlayyatına gəlincə, AYNA agentliyi Bakı istisna olmaqla digər ərazilərdə avtobus daşımaları üzrə Daxili İşlər Nazirliyi ilə razılaşdırmaqla, marşrutların sxemini, həmin marşrutlarda istifadə olunacaq avtonəqliyyat vasitələrinin hərəkət cədvəlini, növünü və onlara dair tələbləri müəyyən edəcək.
Dövlət sifarişi əsasında avtomobillə müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə sərnişin daşımalarının yerinə yetirilməsinə daşıyıcıları müsabiqə qaydasında cəlb etmək, müsabiqənin qalibləri ilə müvafiq marşrut üzrə sərnişin daşınması haqqında müqavilə bağlamaq və müqavilə şərtlərinə əməl olunmasına nəzarət etmək də AYNA-ya həvalə edilib.
Bundan başqa, Agentlik müntəzəm sərnişindaşıma xidmətləri yerinə yetirən avtobusların fəaliyyətini tənzimləmək məqsədilə mərkəzləşdirilmiş dispetçer xidməti yaratmaq və onun fəaliyyətini təşkil etmək səlahiyyətinə malikdir. Eləcə də Agentlik avtobusla sərnişin daşımalarında gediş haqqının nağdsız ödənilməsini təmin edən ödəniş sisteminin yaradacaq.
Agentliyin əsas fəaliyyət istiqamətlərindən biri ölkədə rəqəmsal taxoqraf kartları üzrə milli sistemin fəaliyyətinin təmin olunması, tənzimlənməsi və idarə olunmasında iştirak etməkdir.
Ölkə daxili və xarici daşımalar həyata keçirən yük və sərnişin avtomobillərinə qulluq və təmir stansiyalarının işinə də Agentlik nəzarət edəcək.
AYNA avtovağzalların (avtostansiyaların), dayanacaq məntəqələrinin, avtomobil duracaqlarının, terminalların, habelə avtomobillərə texniki xidmət göstərən texniki-təmir stansiyalarının (sahələrinin), yanacaqdoldurma məntəqələrinin yerləşdirilməsi, yaxud təyinatı bu sahəyə dəyişdirilməklə yenidən qurulmasına dair rəy verəcək.
Avtomobillərin reysqabağı texniki müayinəsi, sürücülərin reysqabağı tibbi müayinəsini təşkil etmək və ona nəzarət də AYNA-ya tapşırılıb.
Nizamnaməyə əsasən, Agentliyin idarəetmə orqanı onun İdarə Heyətidir. İdarə heyəti 4 üzvdən ibarətdir və onları Rəqəmsal inkişaf və nəqliyyat naziri təyin edir.
Prezidentin fərmanına əsasən AYNA agentliyinin nizamnamə fondu 5 642 390 manat müəyyən edilib.
