Metro ilə sərnişindaşımalar müvəqqəti dayandırıldığından hazırda Bakı şəhərində sərnişindaşımalar avtobuslarla həyata keçirilir. Sərnişin axınının vaxtında və düzgün idarə olunması məqsədilə Bakı Nəqliyyat Agentliyi nəqliyyat planı hazırlayıb.
Agentlikdən bildirilib ki, plana əsasən, hazırda sərnişindaşımalar üzrə 153 müntəzəm və 10 ekspres marşrut xətti xidmət göstərir. Bu xətlər üzrə ümumilikdə 2100-dək avtobus cəlb olunub ki, bu da adi rejimlə müqayisədə 13-15 faiz çoxdur. Daha 70 avtobus isə ehtiyat olaraq səhər və axşam pik saatlarında daşımalara cəlb olunacaq.
Avtobusların sayı və intervalı sərnişin tələbatına uyğun olaraq tənzimlənir. Lakin daşımaların rahat və vaxtlı-vaxtında təmin olunması üçün avtobusların maneəsiz hərəkətinə ciddi zərurət var. Belə ki, bu gün səhər aparılan müşahidələr də onu göstərir ki, gün ərzində xüsusilə pik saatlarında nəqliyyatın hərəkətində yaranan sıxlıqlar avtobuslararası hərəkət intervalının pozulmasına, avtobusların uzun müddət tıxacda qalmasına səbəb olur. Bu isə öz növbəsində dayanacaq məntəqələrində gözləyən sərnişin sayının artmasını və avtobuslarda sərnişin sıxlığının yaranmasını qaçılmaz edir.
Bunu nəzərə alaraq fərdi avtomobil sürücülərindən xahiş edilir ki, avtobusların hərəkət üstünlüyünə anlayışla yanaşsınlar. Xüsusən də avtobusların dayanacaq məntəqələrinə sərbəst giriş-çıxışına şərait yaradılmalıdır. Dayanma-durma və parklanma qaydalarına ciddi şəkildə əməl olunmalıdır. Nəqliyyat vasitələrinin dayanacaq məntəqələrinin ərazisində, avtobusların hərəkət trayektoriyasında park edilməsinə yol verilməməlidir.
Məlumat üçün bildirilib ki, sərnişindaşımaların təşkilində Bakı Nəqliyyat Agentliyinin 20-dən çox əməkdaşı iştirak edir. Bundan əlavə sərnişin axını yüksək olan 30-dan çox dayanacaq məntəqəsində 120-dən artıq nəzarətçi xidmət edir.
