Rusiyanın əsas ərazisini 2014-cü ildə işğal edilmiş Krım yarımadası ilə birləşdirən Krım körpüsündə yanğın başlayıb.
Eləcə də bax: Ukrayna Xersonda 30-a yaxın ərazini - AZAD EDİB
FED.az xəbər verir ki, yanğın artıq oktyabrın 8-ə keçən gecədən başlayıb.
Hadisə yerindən yayılan şəkillərdən görünür ki, köpünün üstündəki yanacaq qatarındakı vaqonlar yanır, burada nəqliyyatın hərəkəti dayanıb.
Rusiya mənbələri bildirir ki, yanğına səbəb sisternanın alışmasıdır:
«Naviqasiya tağlarına ziyan dəyməyib. Səbəb və nəticələr barədə danışmaq tezdir. Hazırda yanğının söndürülməsi istiqamətində işlər aparılır», deyə yerli qurumlardan bildirilib.
Krım rəhbərinin məsləhətçisi Oleq Krüçkov Teleqram kanalında bildirib ki, «İlkin məlumata görə, yanacaqla dolu sistern yanır. Yanğının söndürülməsi istiqamətində işlər aparılır».
Bəzi Ukrayna mənbələri isə körpüdə yanğının Ukrayna tərəfindən törədildiyinə işarə edirlər.
Xatırladaq ki, Ukrayna prezidentinin ofisinin rəhbərinin müşaviri Mixail Podolyak bildirib ki, Ukrayna Krım körpüsünü «qanuni hərbi hədəf kimi görür».
Ukraynanın milli təhlükəsizlik və müdafiə şurasının katibi Aleksey Danilov isə bildirib ki, Rusiya prezidenti Vladimir Putin Krım körpüsünü məhv olmaqdan qoruya bilər, amma bu yalnız Krımdan bütün işğalçılar çıxdıqdan sonra mümkün olacaq.
Xatırladaq ki, Rusiyanın əsas hissəsini 2014-cü ildə işğal edilmiş Kram yarımıdası ilə birləşdirən körpünün uzunluğu 19 kilometrdir. Buradan avtomobil və dəmir yolları keçir. Krım körpüsü 2018-ci ildə Rusiya prezidenti Vladimir Putinin iştirakı ilə fəaliyyətə başlayıb.
