Aqrar Sığorta Fondunun nümayəndələri kəskin hava şəraiti – intensiv yağışlar və dolu nəticəçində əkin sahələri zərər çəkmiş bölgələrdə görüşləri davam etdirir.
Hava şəraiti pisləşdi: Aqrar Sığorta Fonduna müraciətlər başlandı
FED.az xəbər verir ki, mayın 27-də Fondun nümayəndələri güclü yağışlar və dolu vurmasından zərər çəkmiş Zaqatala rayonunun 3-cü Tala kəndi və Qax rayonunun Əlibəyli və Tasmalı kəndlərində fermerlərlə görüş keçiriblər.
Aqrar Sığorta Fondunun, yerli icra qurumları, Zaqatala və Qax Dövlət Aqrar İnkişaf Mərkəzlərinin (DAİM) rəhbərliyinin də iştirak etdiyi görüşlərdə təsərrüfatlara dəyən zərər müzakirə olunub, aqrar sığorta barədə geniş məlumat verilib.
Qeyd edək ki, son günlər bu bölgələrdə hadisələrə bağlı onlarla müraciət qeydə alınıb. Güclü yağış, sel-subasma və dolu yağması nəticəsində buğda, arpa, qarğıdalı əkinlərinə, tütün fındıq və digər bağlara ziyan dəyib. Bir neçə gün əvvəl baş verməsinə baxmayaraq kəndlərdə bəzi ərazilərdə əkin sahələri və bağlar hələ də su altındadır.
Görüşdə qeyd edilib ki, aqrar sığorta hava şəraiti nəticəsində təsərrüfatlara zərər vuran hadisələri qarşılayır və əkin sahələrini sığortalamış fermerlər dəyən zərərlərə görə sığorta ödənişləri alacaqlar.
Kəndlərdə keçirilən görüşlərdə məlum olub ki, fermerlərin bir hissəsi əkin sahələrini sığorta ediblər və bu sahədə baş verən hadisələr Aqrar Sığorta Fondunda qeydə alınıb. Bəzi fermerlər öz təsərrüfatlarına dəymiş zərər barədə elə görüşdəcə məlumat veriblər və onların müraciəti ASF əməkdaşları tərəfindən qeydə alınıb. Bildirilib ki, hazırda ölkənin digər regionlarında olduğu kimi, Şəki-Zaqatala bölgəsində də Fondun ekspertləri sığortalı təsərrüfatlarda dəyən zərərləri hesablamaqdadırlar, yekun qiymətləndirmədən sonra fermerlərə ödəniş ediləcək.
Eyni zamanda 3-cü Tala, Əlibəyli və Tasmalı kəndlərində görüşlərdə məlum olub ki, təsərrüfatı zərər çəkmiş bəzi fermerlərə daha əvvəl fond və yerli filiallar tərəfindən aqrar sığortadan istifadə etmək təklif olunsa da, onlardan bəziləri bu imkandan yararlanmayıb və ya əkin sahəsini sığortalamaqda gecikiblər. Belə vəziyyətlə üzləşdikdən sonra isə fermerlər əkin sahələrini hökmən vaxtında sığorta edəcəklərini bildiriblər.
Fermerlərin diqqətinə çatdırılıb ki, Azərbaycanda aqrar sığorta vasitəsilə 48 növ bitkini, o cümlədən zərər dəymiş bütün əkinləri sığortalamaq mümkündür. Aqrar sığortaya dövlət dəstəyi, yəni sığorta haqqının 50%-nin dövlət tərəfindən ödənilməsi nəticəsində fermerlər cüzi ödəniş etməklə əkin sahələrini sığorta edə bilərlər. Məsələn, Şəki-Zaqatala regionunda 1000 manatlıq buğda və ya arpa məhsulunun sığortalanması fermerlərə cəmi 20 manata başa gəlir. Bu məbləğ nəinki gözlənilən məhsulun qiymətindən, həm də fermerin əkin üçün sərf etdiyi vəsaitdən də 10 dəfələrlə azdır.
Fermerlərə xatırladılıb ki, 2023-cü ildə Aqrar Sığorta Fondun tərəfindən fermerlərə 4,4 milyon manat, bu ilin ilk 4 ayında isə 2 milyon manatdan çox ödənişlər edilib və bu proses davam etməkdədir.
