Xəbər verdiyimiz kimi, Vergilər Nazirliyi “Middle Way Hotels Group” MMC adlı şirkəti dövlət qeydiyyatına alıb.

FED.az xəbər verir ki, şirkətin direktoru İntiqam Xankişiyev planları barədə ətraflı məlumat verib.

O bildirdi ki, indiyədək pərakəndə şəkildə fəliyyət gösətərən hostel və otellər “Middle Way Hotels Group” tərəfindən bir mərkəzdən idarə ediləcəkdir.

İntiqam Xankişiyev qeyd etdi ki, “Middle Way Hotels Group” orta təbəqəni hədəfləyən hostel, otel və restoranlar istifadəyə verməyi planlaşdırır:

“Biz 4-5 ulduzlu otellər  ilə orta təbəqəyə fokuslanmağı qarşımıza məqsəd qoymuşuq. Hazırda Bakıda və Qusarda otellərimiz fəaliyyət göstərir. İlkin mərhələdə icarəyə obyekt götürməklə  bir neçə otel və restoran açmağı nəzərdə tuturuq”.

İntiqam Xankişiyev əlavə etdi ki, bu yaxınlarda Bakının mərkəzində 52 otaqdan ibarət butik otelin istifadəyə verilməsi planlaşdırılır:

“İlkin mərhələdə təkcə Bakıda 1000 otaqdan ibarət otellər şəbəkəsini yaratmağı qarşımıza məqsəd qoymuşuq”.

Şirkətin direktoru qeyd etdi ki, hazırda fəaliyyət göstərən “Caspian Business Hotel”, “Park Resort Hotel” (“Park Qusar” adı ilə tanınır) və “4 Dəniz incisi” adlı hostel “Middle Way Hotels Group” tərəfindən idarə olunur.

“İyun ayının əvvəlində Bakıda “4 Dəniz incisi” hostelinin yaxınlığında balıq restoranımız fəaliyyətə başlayacaqdır. “4 Dəniz incisi” hosteli telestudiyanın yaxınlığında yerləşir”.

İntiqam Xankişiyev bildirdi ki, Azərbaycana gələn turistlərin sayının artması ilə otellərə də təlabat artır: “Qusarda “Şahdağ”dan 5 kilometr məsafədə yerləşən “Park Resort Hotel”in genişlədirilməsi nəzərdə tutulur. 130 otaqdan ibarət yeni otelin tikilməsi planlaşdırılır. Bu il otelin təməli qoyulacaqdır”.

İntiqam Xankişiyev vurğuladı ki, “Park Resort Hotel”  64 otaqdan ibarətdir və eyni anda 300 nəfərədək qonağa xidmət göstərə bilir.

Xəbər verdiyimiz kimi, Azərbaycanda “Middle Way Hotels Group” MMC qeydiyyatdan keçib. Bu barədə Vergilər Nazirliyinin “Vergilər” qəzetinin xüsusi buraxılışında məlumat dərc olunub. MMC-nin hüquqi ünvanı Nərimanov rayonu məhəllə 1222, ev 12-dir. Aprelin 18-də dövlət qeydiyyatına alınan otelin qanuni təmsilçisi İntiqam Kamal oğlu Xankişiyevdir.