Cari ilin yanvar-noyabr aylarında Qəbələ rayonundakı hotel və mehmanxana tipli müəssisələrə 93 min 431 nəfər yerli və əcnəbi turist yerləşdirilib. Onların 35 min 620 nəfəri və ya 38,1 faizi Azərbaycan, 57 min 811 nəfəri və ya 61,9 faizi xarici ölkə vətəndaşı olub.
FED.az xəbər verir ki, bu barədə Qəbələ Rayon Statistika İdarəsi məlumat yayıb.
Bildirilib ki, yanvar-noyabr aylarında Qəbələnin hotel və mehmanxana tipli müəssisələrinə yerləşdirilən yerli və əcnəbi turistlərin sayı ötən ilin eyni dövrü ilə müqayisədə 20 min 211 nəfər və ya 27,6 faiz artıb. On bir ayda yerli turistlərin sayında keçən ilin müvafiq dövrü ilə müqayisədə 547 nəfər və ya 1,6 faiz, əcnəbi turistlərin sayında isə 19 min 664 nəfər və ya 51,5 faiz artım qeydə alınıb.
Cari ilin yanvar-noyabr aylarında Qəbələyə gələn əcnəbi turistlər arasında Hindistan vətəndaşları əvvəlki aylarda olduğu kimi, yenə də üstünlük təşkil ediblər. Belə ki, on bir ayda bu ölkənin 25 min 283 vətəndaşı Qəbələdə olub. Ümumiyyətlə, yanvar-noyabr aylarında Qəbələyə Səudiyyə Ərəbistanından 11602, Birləşmiş Ərəb Əmirliklərindən 5594, Küveytdən 2740, Pakistandan 2537, Gürcüstandan 1134, Rusiyadan 930, Omandan 861, Qətərdən 852, İsraildən 735, Türkiyədən 278, Böyük Britaniyadan 237, ABŞ-dan 243, Bəhreyndən 197, Özbəkistandan 81, Qazaxıstandan 74, İrandan isə 60 turist səfər edib. Bundan əlavə, həmin müddətdə Qəbələyə digər ölkələrdən də xeyli sayda əcnəbi turist gəlib.
On bir ayda Qəbələ rayonu ərazisində yerləşən 20 mehmanxana və mehmanxana tipli müəssisədən 17-si fəaliyyət göstərib. Bir gün qonaqlamaq üçün orta qiymət 37 manat təşkil edib. Turistlərin qonaqlama müddəti 1-2 gün olub. Bu müddətdə turizm obyektlərində 942 işçi çalışıb.
