Xəbər verildiyi kimi, fevralın 2-də Azərbaycana məxsus yük maşınlarının Qarabağda rus sülhməramlıları ilə yanaşı, həm də erməni "polisləri" tərəfindən də yoxlanılmasını əks etdirən kadrlar yayılıb.
FED.az xəbər verir ki, bu kadrlar Rusiya Müdafiə Nazirliyinin rəsmi internet saytında yerləşdirilib. Rusiya Müdafiə Nazirliyinin məlumatına görə, video Azərbaycana məxsus 20-yə yaxın yük maşınının daxil olduğu iki kortejin Suqovuşan-Qızqala-Vəng istiqamətində və əksinə hərəkəti zamanı çəkilib.
Kadrlarda görünür ki, Azərbaycana məxsus yük maşınlarının rus sülhməramlı kontingenti ilə yanaşı Qarabağda separatçıların polis uniformasını geyinən bir şəxs tərəfindən də yoxlanılır. Bu - Azərbaycan ictimaiyyətində böyük narazılıq yaradıb.
Yoxlamada sülhməramlılara məxsus formada olan iki nəfərlə yanaşı əynində Qarabağdakı separatçılara məxsus polis geyimi olan bir kişi də iştirak edir.
Yoxlanmış yük maşınının aid olduğu yerli şirkətlərdən biri baş verənləri BBC News Azərbaycancaya təsdiqləyib.
"Ruslar dedi ki, erməniləri maşının kabininə baxmağa qoymayın"
Videoda yoxlandığı görünən yük maşınının məxsus olduğu "Qarabağ" yükdaşıma şirkətinin rəhbəri Şövqi Həsənov BBC News Azərbaycancaya müsahibəsində hadisəni təsdiqləyib.
"Maşını Suqovuşandan Kəlbəcərə və əksinə istiqamətdə özüm idarə etdim. Suqovuşanı keçdikdən sonra orda ermənilərin də postu var. Ruslar bizə yaxınlaşıb dedi ki, onları maşının kabininə baxmağa qoymayın, amma yük yerini açın baxsınlar," - Şövqi Həsənov qeyd edib.
Humanitar yüklərin daşınmasını həyata keçirdiklərini deyən Şövqi Həsənov Qarabağdakı "erməni polislərin" maşınların yük yerinə baxdığını deyib.
O qeyd edib ki, ənənəvi olaraq gedib-gəldikləri Murov yolu qarla örtüldüyünə görə bu yoldan istifadə ediblər.
"Şuşaya yük aparanda erməni postlarında bizim maşınlara baxmırdılar"
Daha əvvəl Şuşaya da yük apardığını bildirən Şövqi Həsənov deyir ki, Xankəndi yolu ilə gedib-gəldiyi zaman rus postları ilə yanaşı, müxtəlif erməni postlarından da keçirdilər.
Şirkət rəhbəri vurğulayıb ki, Xankəndidən keçməklə Şuşaya getdikləri zaman heç vaxt "erməni polislər" maşınlara baxış keçirməyiblər.
"Amma bu Kəlbəcər yolunda nə məsələdirsə, maşına baxış keçirirlər. Mən orda ruslara dedim ki, bəs niyə bunlara icazə verirsən maşına baxsın. Erməninin nə maddi marağındadır ki, biz nə aparırıq, nə gətiririk? Dedi, yuxarıdan tapşırıq belədir ki, yük yerlərinə onlar da baxmalıdır. Gedəndə də açdırıb baxdılar, gələndə də," - Şövqi Həsənov deyib.
O əlavə edib ki, onunla birlikdə Kəlbəcərə yük aparan digər sürücülər "erməni polislərin" əvvəllər bu marşrut üzrə yük maşınlarına baxış keçirmədiklərini deyiblər.
"Sürücülər mənə dedilər ki, son 1-2 aydır ermənilər də Azərbaycan maşınlarına baxış keçirir," - yükdaşıma şirkətinin nümayəndəsi bildirib.
Şövqi Həsənov onu da qeyd edib ki, "erməni polislər" yüklərə baxsa da, hərəkətdə olan yük maşınlarını yalnız rus sülhməramlılarına məxsus hərbi avtomobillər müşayiət edir.
Məsələ ilə bağlı Azərbaycan və Rusiya Müdafiə Nazirliklərindən reaksiya almaq mümkün olmayıb.
Azərbaycan hökuməti "videonu araşdırır"
Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aydın Mirzəzadə BBC-yə bildirib ki, hökumət orqanları video ilə bağlı araşdırmalara başlayıb.
Onun sözlərinə görə, indiyədək dəfələrlə Azərbaycana məxsus yük maşınları Rusiya sülhməramlılarının müvəqqəti nəzarəti altında olan ərazilərdən keçməklə, digər bölgələrə səfər ediblər.
Belə bir hadisənin baş verməsini "yolverilməz" adlandıran parlament təmsilçisi məsələnin araşdırılacağını və müvafiq nəticələr çıxarılacağını bildirib.
"Çox təəssüf ki, ara-sıra belə hadisələr baş verir. Buna misal olaraq, bir müddət əvvəl Fransada prezidentliyə namizədin gizlin şəkildə Xankəndi şəhərinə gəlməsi və təxribat xarakterli bəyanatlar verməsini göstərmək olar. Bu cür hadisələrlə bağlı Azərbaycanın çox kəskin reaksiyaları olub," - Aydın Mirzəzadə sözlərinə əlavə edib.
Rusiya Müdafiə Nazirliyi bildirib ki, Dağlıq Qarabağ ərazisi ilə hərəkət edən Azərbaycan yük maşınları tikinti materialları və ərzaq daşıyıblar.
