2025-ci ilin ilk yarısında Azərbaycanın Qarabağ və Şərqi Zəngəzur iqtisadi rayonlarında həyata keçirilən tikinti-quraşdırma işlərinin dinamikası rayonlar arasında kəskin fərqlənib, bəzi ərazilərdə nəhəng artımlar, bəzilərində isə azalma müşahidə olunub.

Fed.az bu barədə Dövlət Statistika Komitəsinin açıqladığı rəqəmlərə istinadən xəbər verir.

Ümumi dəyərə görə, Şərqi Zəngəzur iqtisadi rayonunda daha çox iş görülüb. Hesabat dövründə burada 1 milyard 203 milyon 304,5 min manatlıq tikinti-quraşdırma işləri aparılıb ki, bu da ötən ilin eyni dövrü (1 milyard 222 milyon 817,2 min manat) ilə müqayisədə 19 milyon 512,7 min manat azalma (-1.6%) deməkdir. Qarabağ iqtisadi rayonunda isə bu göstərici 835 milyon 145,3 min manat təşkil edib və ötən illə (905 milyon 716,2 min manat) müqayisədə 70 milyon 570,9 min manat azalıb (-7.8%).

Qarabağ iqtisadi rayonu daxilində rayonlar üzrə göstəricilər aşağıdakı kimi olub.

• Xankəndi şəhərində tikinti işlərinin həcmi 6 milyon 930,0 min manatdan 80 milyon 362,9 min manata yüksələrək, 73 milyon 432,9 min manat artıb (11.6 dəfə çox).

• Xocalı rayonunda da  işlərin dəyəri 24 milyon 737,9 min manatdan 65 milyon 269,8 min manata çataraq 40 milyon 531,9 min manat artıb (2.6 dəfə çox).

• Xocavənd rayonunda 19 milyon 336,9 min manat (+72.7%), Ağdərə rayonunda 5 milyon 861,8 min manat (+66.2%), Bərdə rayonunda isə 9 milyon 817,2 min manat (+65.5%) artım qeydə alınıb. Ağcabədi rayonunda 338,2 min manatlıq artım (+5.9%) baş verib.

• Bunun əksinə olaraq, Füzuli rayonunda tikinti-quraşdırma işlərinin həcmi 226 milyon 458,9 min manatdan 91 milyon 050,4 min manata enib. Bu, 135 milyon 408,5 min manat azalma (2.5 dəfə az) deməkdir və məbləğ ifadəsi ilə ən böyük azalmadır.

• Tərtər rayonunda işlərin həcmi 24 milyon 829,2 min manat azalaraq (2.4 dəfə az) 17 milyon 802,3 min manat təşkil edib. Ağdam rayonunda 47 milyon 685,8 min manat (-15.5%), Şuşa rayonunda isə 11 milyon 966,3 min manat (-5.0%) azalma müşahidə olunub.

Şərqi Zəngəzurda ümumi həcmdə cüzi azalma olsa da, iki rayon artım nümayiş etdirib.

• Ən böyük mütləq artım Laçın rayonunda qeydə alınıb: burada tikinti işləri 242 milyon 400,4 min manatdan 303 milyon 122,1 min manata çatdırılıb. Nəticədə, illik 60 milyon 721,7 min manat (+25.0%) artım baş verib.

• Zəngilan rayonu da 44 milyon 401,6 min manat artımla (+21.9%) seçilib və işlərin həcmi 246 milyon 909,3 min manata çatıb.

• Bütün rayonlar arasında ən yüksək tikinti-quraşdırma işləri həcmi Kəlbəcər rayonundadır. Burada işlər 30 milyon 451,2 min manat azalsa da (-6.9%), yekun həcm 408 milyon 011 min manat olub.

• Qubadlı rayonunda 65 milyon 900,7 min manat (-37.9%), Cəbrayıl rayonunda isə 28 milyon 284,1 min manat (-17.1%) azalma baş verib.