“Fransanın Dağlıq Qarabağın müstəqilliyini birtərəfli qaydada tanıması heç kimin xeyrinə olmadı”.
FED.az istinadən bildirir ki, bu sözləri Fransa Xarici İşlər Nazirliyinin Dövlət Katibi Jan-Batist Lemuan deyib.
“Bu, nə Ermənistanın, nə Dağlıq Qarabağın, nə Fransanın, nə Avropa tərəfdaşlarının, nə də ATƏT-in Minsk Qrupunun həmsədrlərinin maraqlarına uyğun deyil”, - deyə siyasətçi qeyd edib. Onun sözlərinə görə, bu, “Fransa hökumətinin siyasəti deyil, Ermənistanın siyasəti deyil, tərəfdaş siyasəti deyil”.
O xatırladıb ki, heç bir dövlət, o cümlədən Ermənistan Dağlıq Qarabağın “müstəqilliyini” tanımayıb. “Fransa yalnız tərəflərin hər birinin ona güvəndiyi zaman vasitəçilik edə bilər. Bu məsələyə belə bir addımın bütün nəticələrini dərk edərək həqiqət və məsuliyyət ruhunda yanaşmaq lazımdır. Qarabağ problemi birtərəfli jest nəticəsində deyil, yalnız tərəflərin dialoqu nəticəsində öz həllini tapa bilər”, - deyə Lemuan vurğulayıb.
“Bu gün tərəflər heç vaxt olmadığı kimi bu dialoqu davam etdirmək üçün Minsk Qrupu həmsədrlərinin dəstəyinə ehtiyac duyurlar”, - deyə diplomat əlavə edib.
Xatırladaq ki, ötən gün Fransa Senatı səs çoxluğu ilə hökumətdən qondarma “Dağlıq Qarabağ Respublikası”nı tanımağa çağıran qərar qəbul edib. Qərar tövsiyə xarakteri daşıyır.
