İndiyədək Ermənistanla iki dəfə atəşkəs razılaşması əldə edilsə də, qarşı tərəf buna əməl etməyib. Ona görə də Azərbaycan tərəfi qarşı tərəfi atəşkəs çağırışlarına inanmır.
FED.az xəbər verir ki, Prezident İlham Əliyev bu gün Müdafiə Nazirliyində keçirilən müşavirədə atəşkəsin şərtlərini açıqlayıb. Dövlət başçısı deyib ki, atəşkəs qeyd-şərtsiz ola bilməz. Ermənistan rəhbərliyi bununla bağlı öhdəlik götürməlidir:
«İki dəfə Ermənistanın xahişi ilə, böyük dövlətlərin təklifi ilə atəşkəs elan olunmuşdur. İki dəfə də Ermənistan bu atəşkəsi pozub. Birinci dəfə elə bir gün keçməmiş Gəncəni bombalamışdır. İkinci dəfə atəşkəsdən iki dəqiqə sonra atəşkəsi pozmuşdur. Belə olan halda, Azərbaycan əlbəttə ki, onlara layiqli cavabını verib və verəcək. Bundan sonra da düşməni torpaqlarımızdan qovacaq, sona qədər qovacaq.
Bizim bir şərtimiz var, əgər Ermənistanın təəssübkeşliyini çəkən, onlara havadarlıq edən və faktiki olaraq 30 ilə yaxın bizim torpaqlarımızın işğal altında qalması üçün ermənilərə, Ermənistana şərait yaradan ölkələr atəşkəs istəyirlərsə Ermənistana təzyiq göstərilməlidir. Ermənistanın baş naziri bəyanat verməlidir ki, Ermənistan işğal edilmiş torpaqlardan çıxacaq. Belə bir bəyanatı biz eşitməmişik. Əksinə, xalqların öz müqəddəratı haqqında danışır və faktiki olaraq danışıqlar prosesini məhv edibdir».
Dövlət başçısının sözlərindən məlum olur ki, rəsmi Bakı qeyd-şərtsiz atəşkəs təklifini qəbul etməyəcək. Çünki bu danışıqların uzanmasına səbəb olur və nəticə vermir: «Atəşkəs qeyd-şərtsiz ola bilməz. Yenə 27 il, yenə 30 il bizim başımızı aldadacaqlar, yenə 30 il buraya nümayəndə heyətləri gələcək, danışıqlar aparılacaq. Biz boğaza yığılmışıq, Azərbaycan xalqının səbri tükənib. İyirmi səkkiz il bundan əvvəl Minsk qrupu yaradılıb. İyirmi səkkiz il bizi aldadırlar. İyirmi səkkiz il bizə söz veriblər, vəd veriblər ki, gözləyin, dayanın, Ermənistana təzyiq edəcəyik, belə edəcəyik, elə edəcəyik. Hamısı yalan idi. Hər kəs də bunu görür».
