Gələn il Ağdam-Füzuli avtomobil yolunun inşasının yekunlaşdırılması nəzərdə tutulub.
Bərdə-Ağdam dəmir yolu xətti çəkilir, dəmiryolu və avtovağzal insa ediləcək
FED.az xəbər verir ki, bunu Qarabağ iqtisadi rayonuna daxil olan işğaldan azad edilmiş ərazilərdə Prezidentin xüsusi nümayəndəsinin müavini Bəşir Hacıyev Bakıda keçirilən "Güclü iqtisadiyyat üçün Azərbaycanda peşə təhsilinin inkişaf yolu: gələcəyə baxış" adlı konfrans çərçivəsində təşkil olunmuş "Böyük Qayıdış: yeni iqtisadi reallıqlar və əmək bazarının dəyişən tələbləri" mövzusunda panel müzakirələrində bildirib.
Bundan başqa, o qeyd edib ki, Bərdə-Ağdam avtomobil yolunun inşası da yekunlaşmaq üzrədir.
"Artıq həmin ərazidə "Azərenerji" ASC 2 yarımstansiya istifadəyə verib. Ağdamda "Böyük Qayıdışa dair I Dövlət Proqramı"na uyğun olaraq 2026-cı ilin sonuna qədər 5 yaşayış məhəlləsi və 12 kənd inşa olunaraq sakinlərə təhvil veriləcək. Ağdamda tarixi-mədəni abidələr də bərpa olunur, mərkəzi və meşə parkları layihələndirilir və yaxın zamanda inşasına başlanacaq. Ağdam əvvəllər də sənaye şəhəri kimi tanınıb. İndi burada sənaye parkı var və rezidentlər zavod, fabriklərin inşasına başlayıb. Növbəti il onların bir neçəsinin açılışı olacaq", - deyə B.Hacıyev əlavə edib.
Hadrutda və Tuğda torpaq işlərinə başlanılacaq
Prezidentin xüsusi nümayəndəsinin müavini bildirib ki, yaxın günlərdə Xocavənd rayonunun Hadrut qəsəbəsində və Tuğ kəndində torpaq işlərinə başlanılacaq.
"Hazırda layihələndirmə prosesi gedir. Növbəti mərhələdə kommunikasiya xətlərinin qurulması, evlərin inşası həyata keçiriləcək. Tərtər rayonunun Talış kəndində və Suqovuşan qəsəbəsində də işlər davam etdirilir. Talışda 20 fərdi ev bərpa olunub, ailələr köçürülüb. II fazada 158 fərdi evin inşası nəzərdə tutulub. Suqovuşanda isə 5 ədəd beşmərtəbəli yaşayış binasının inşasına başlanıb və gələn ilin yay aylarında istifadəyə veriləcək", - deyə o qeyd edib. (Report)
