Qiymət dəyişikliklərinə ən həssas sahələrdən biri olan kriptovalyuta bazarında növbəti böyük eniş yaşanıb.
Dogecoin, Bitkoin və Ethereum «uçur» - KƏSKİN BAHALAŞMA – YENİ QİYMƏTLƏR
FED.az xəbər verir ki, dünən axşam saatlarında Tesla şirkətinin rəhbəri Elon Mask Tvitter hesabında açıqlama yayaraq, elektrikli avtomobillərin alqı-satqısında Bitcoindən istifadəni dayandırdıqlarını bildirib: “Biz Bitcoinin mayninqi və sövdələşmələrində bir çox enerji növlərindən, xüsusilə istənilən yanacaq növündən daha pis ekoloji emissiyalara malik kömürdən intensiv şəkildə istifadə olunmasından narahatıq. Kriptovalyuta bir çox səviyyələrdə yaxşı ideyadır və biz onun vədedici gələcəyinə inanırıq, lakin bu, ətraf mühit üçün böyük xərclər hesabına baş verə bilməz. Tesla heç bir Bitcoin satmayacaqdır və biz ondan yalnız mayninq fəaliyyətləri daha dayanıqlı enerjiyə keçid etdikdən sonra istifadə etmək niyyətindəyik”.
Açıqlamanın ardından birjalarda kriptovalyutalar üçün əsl “cəhənnəm” yaşanıb: Coinmarketcap.com-un məlumatına görə, Sinqapur vaxtı ilə bugün səhər saat 6-da 2,43 trilyon dollar təşkil edən bazar dəyəri 8:45-də artıq 365,8 milyard dollar kiçilərək, 2,06 trilyona düşüb. Sonradan qiymətlər nisbətən sabitləşsə, də ən azı 165 milyard dolların itirildiyi şübhəsizdir. Bitcoin 12% ucuzlaşaraq, aprelin 24-dən etibarən ilk dəfə 50 min dolların altına düşüb. Ether və XRP kimi digər kriptovalyutalar da sürətlə ucuzlaşıb.
Bitcoin adi valyutalar kimi tək bir mərkəzi bank tərəfindən buraxılmır. “Maynerlər” adlanan şəbəkə tərəfindən saxlanılan Bitcoinin yaradılması və tranzaksiyaların baş tutması üçün mürəkkəb riyazi əməliyyatlar həyata keçirən xüsusi qurulmuş superkompüterlər tələb olunur. Bu qurğular həddən artıq iri həcmdə enerji sərf edir və Digiconomistin məlumatına görə Bitcoin sənayesi bir ildə Niderlandın sərf etdiyi enerjidən daha çox istehlak edir. İllik karbon emissiyalarının həcmi isə 37 meqatondur ki, bu göstərici ilə Yeni Zelandiya ilə müqayisə oluna bilər.
Xatırladaq ki, ötən il Square və Tesla kimi şirkətlər Bitcoin almaqda maraqlı olduqlarını açıqladıqdan sonra bu kriptovalyuta sürətlə dəyər qazandı və son 12 ay ərzində 400% bahalaşdı. Goldman Sachs və Morgan Stanley kimi Wall Street-in iri bankları da zəngin müştərilərinə Bitcoin təklif edirdilər. Bu ilin fevralında isə Tesla hökumət orqanlarına təqdim etdiyi sənəddə 1,5 milyard dollar dəyərində Bitcoin satın aldığını və ödəniş vasitəsi kimi istifadə edəcəyini bildirmişdi. Maskın hazırkı açıqlaması kriptovalyuta bazarı üçün ciddi siqnaldır.(marja)
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
