Bu aydan etibarən Azərbaycanda Böyük Britaniyaya məxsus investisiya şirkəti işə başlayacaq.
«Plato Capital and Co. İnvestisiya Şirkəti»ndən FED.az-a verilən məlumata görə, ASC şirkətlərə investisiya cəlb etməkdə yardımçı olacaq.
Eləcə də bax: Azərbaycandakı investisiya şirkətlərinin - RENKİNQİ
Maliyyə qurumunun direktoru Mansur Məmmədov FED.az-a bildirib ki, şirkətin əsas xidmətləri korporativ maliyyə və məsləhət xidmətləri, o cümlədən yerli şrkətlərə xarici kapitalın cəlb edilməsi olacaq.
«Biz şirkətlərə investisiya cəlb etməkdə yardımçı olacayıq. Əsas binzesimiz Azərbaycanda olan şirkətlər üçün maliyyənin tapılması və cəlb edilməsi olacaq. Şirkətlərə consulting və adviser xidmətləri göstərəcəyik. Əgər əməkdaşlıq etdiyimiz şirkətlər əlavə olaraq broker xidmətində maraqlı olsalar bu xidməti də göstərə bilərik. Xidmətlərimizin qiymətləri layihədən asılı olaraq dəyişəcək. Hazırda 2 əməkdaşlıq etdiyimiz şirkət var. Bu şirkətlər real sektoru təmsil edir. Çalışırıq ki, ölkəyə fayda gətirək». - deyə Mənsur Məmmədov bildirib.
«Plato Capital and Co. İnvestisiya Şirkəti»nin rəhbərinin sözlərinə görə, noyabrda Maliyyə Bazarlarına Nəzarət Palatası (MBNP) şirkətin yeni adına uyğun olaraq lisenziyanı yeniləyib. Həmçinin şirkətin işçiləri də MBNP-nın imtahanlarından da uğurla keçib (hazırda MBNP ləğv edilərək Mərkəzi Banka birləşdirilib – FED.az).
Xatırladaq ki, «Plato Menecment»i 2002-ci ildə, hazırda ləğv prosesində olan «Texnika Bank» ASC «Texnika Kapital Menecment» adı ilə yaratmışdı. Bankın lisenziyası ləğv edildikdən sonra investisiya şirkəti adını «Kapital Menecment»ə dəyişərək Azərbaycan Əmanətlərin Sığortalanması Fondunun (ADIF) nəzarətinə keçib. 2018-ci ildən isə şirkət «Plato Menecment» adlanır, nizamnamə kapitalı 680 min manatdır. İnvestisiya şirkətinin səhmlərinin 99%-i Böyük Britaniyanın «Plato Capital International Holding Limited» investisiya şirkətinə, 1%-i isə Birləşmiş Ərəb Əmirliklərinin «Fubies Bia Investments Lımıted» investisiya şirkətinə məxsusdur.
