“2024-2026-cı illərdə maliyyə sektorunun inkişafı Strategiya”sına uyğun olaraq, kapital bazarları iştirakçılarının dayanıqlı fəaliyyətinin təmin edilməsi, həmçinin beynəlxalq tənzimləmə standartlarına uyğunluq səviyyəsinin artırılması məqsədilə Mərkəzi Bankın İdarə Heyətinin 1 aprel 2026-ci il tarixli qərarı ilə “İnvestisiya şirkətinin davamlı kapital tələbləri Qaydası”na dəyişiklik edilib.
Birjadakı əməliyyat sayı dinamikası üzrə investisiya şirkətlərinin - RENKİNQİ - (YANVAR-MART/2026)
FED.az biznes və maliyyə xəbərləri portalı bu barədə Azərbaycan Mərkəzi Bankına (AMB) istinadən xəbər verir.
Dəyişikliklər investisiya şirkətlərinin təsnifləşdirilməsini, onların kateqoriyalarının dəyişməsi hallarının tənzimlənməsini, kapital tələblərinin hesablanmasında yeni yanaşmanın tətbiqini, habelə likvid aktivlərə və leverec əmsalına dair yeni tələbləri ehtiva edir.
Kapital tələblərinin hesablanmasında yeni yanaşma investisiya şirkətlərinin ticarət kitabının həcmi ilə yanaşı, investisiya xidmətlərinin göstərilməsindəki aktivliyini də nəzərə alaraq onların fəaliyyətinin daha mütənasib tənzimlənməsinə şərait yaradacaqdır.
İnvestisiya şirkətlərinin likvid aktivlərinə dair yeni tələblər və leverec əmsalının minimum həddinin müəyyən olunması kapital bazarında vasitəçilik fəaliyyəti həyata keçirən iştirakçıların dayanıqlı inkişafına xidmət edir.
İnvestisiya şirkətlərinin yeni requlyativ mühitə uyğunlaşması üçün 6 ay müddət müəyyən edilib. Bu müddət ərzində hər bir investisiya şirkəti öz kateqoriyasını müəyyən etməli, bununla bağlı Mərkəzi Banka məlumat verməli və fəaliyyətini yeni Qaydaya uyğunlaşdırmalıdır.
Qeyd edək ki, Mərkəzi Bank tərəfindən Azərbaycan Kapital Bazarları Assosiasiyasında (AKBA) təqdimat təşkil olunaraq Qaydalara təsdiqlənmiş yeni dəyişikliklər ətrafında müzakirələr aparılıb və sektor nümayəndələrini maraqlandıran suallar cavablandırılıb.
“İnvestisiya şirkətinin davamlı kapital tələbləri Qaydası”na dəyişiklikləri bu linkdən nəzərdən keçirmək mümkündür:
https://e-qanun.az/framework/61682
