"Zöhrab Hidayətov müxtəlif hüquqi və fiziki şəxslərə aid məhsulların ölkədən saxta yolla sahibkar kimi qeydiyyatdan keçirdiyi Elvin Şirinovun və Qaçqın Hümbətovun adından ixrac olunmasını təşkil edib, ixrac üçün nəzərdə tutulan bu məhsulların istehsalçılarının guya həmin şəxslər olduğuna dair gömrük orqanlarına saxta sənədlər təqdim edib, 326 milyon manatdan çox xüsusilə külli miqdarda məhsulları düzgün bəyan etməyərək xaricə çıxarmaqla qaçaqmalçılıq edib, bu qanunsuz əməllər eyni zamanda nağd pul vəsaitlərinin ölkədən çıxarılması və geri qaytarılmaması, kölgə iqtisadiyyatı qurulması üsulu olub".
FED.az xəbər verir ki, Azərbaycanda Dövlət Təhlükəsizliyi Xidməti tərəfindən araşdırılan iş üzrə qalmaqallı məhkəmə prosesi başlayıb. Məhkəmə indiyədək az-az hallarda ortaya çıxan olduqca böyük məbləğli fırıldaq işi ilə bağlıdır.
DTX-nin tərəfindən istintaqı aparılmış cinayət işi üzrə Hidayətov Zöhrab Raqub oğlu, Şirinov Elvin Valeh oğlu və Hümbətov Qaçqın Şura oğlu barəsində məhkəmə prosesi başlanılıb.
Qızıl külçələri qaçaqmalçılıqla Azərbaycana keçirən vəzifəli şəxslərin məhkəməsi başlayıb
FED.az xəbər verir ki, təqsirləndirilən ilk iki şəxs - Zöhrab Raqub oğlu və Hümbətov Qaçqın Şura oğlunun adı ictimaiyyət arasında tanınmasa da, Şirinov Elvin Valeh oğlu indiyədək Azərbaycanın ən böyük özəl sahibkarı kimi tanınırdı.
Son aylara qədər ölkə mətbuatı (o cümlədən FED.az biznes və maliyyə xəbərləri portalı da) rəsmi açıqlanan məlumatlar əsasında onun ölkədən ixrac eydiyi nəhəng məbləğdə kənd təsərrüfatı məhsullarının həcmi barədə məlumatlar yayırdı. Həmin məlumatların bəziləri aşağıdakılardır:
Azərbaycan iş adamı xaricə 118 milyon dollarlıq - MEYVƏ-TƏRƏVƏZ SATIB
Şirinov Elvin məhsul ixracında liderliyini saxlayıb - GƏLİRLƏRİ 3 DƏFƏ ARTIB
Elvin Şirinov xaricə meyvə-tərəvəz satışından - 85 milyon dollar əldə edib - AZƏRBAYCANDA İLK DƏFƏ
İndi isə bütün bu prosesin saxta olduğu aşkar edilib.
Bu gün Sumqayıt Ağır Cinayətlər Məhkəməsinin hakimi Fəhmin Hümbətovun sədrliyi ilə iş üzrə hazırlıq iclası keçirilib.
Cinayət işinin materiallarında deyilir ki, təqsirləndirilən şəxslər Cinayət Məcəlləsinin 192.3.2 və 206.3.2-ci maddələri ilə ittiham olunur. Belə ki, Zöhrab Hidayətov müxtəlif hüquqi və fiziki şəxslərə aid məhsulların ölkədən saxta yolla sahibkar kimi qeydiyyatdan keçirdiyi Elvin Şirinovun və Qaçqın Hümbətovun adından ixrac olunmasını təşkil edib.
Onlar ixrac üçün nəzərdə tutulan bu məhsulların istehsalçılarının guya həmin şəxslər olduğuna dair gömrük orqanlarına saxta sənədlər təqdim edib, 326 milyon manatdan çox xüsusilə külli miqdarda məhsulları düzgün bəyan etməyərək xaricə çıxarmaqla qaçaqmalçılıq edib, bu qanunsuz əməllər eyni zamanda nağd pul vəsaitlərinin ölkədən çıxarılması və geri qaytarılmaması, kölgə iqtisadiyyatı qurulması üsulu olub.
Təqsirləndirilən şəxslərdən Elvin Şirinov barədə bəzi maraqlı detallar mətbuata məlumdur. Belə ki, ötən illər üzrə İqtisadi İslahatların Təhlili və Kommunikasiya Mərkəzi (İİTKM) “İxrac icmalı”larına əsasən, əvvəllər, məsələn 2021-ci ildə Elvin Şirinov ümumiyyətlə qeyri-dövlət (özəl) ixracatçı subyektlər sırasında yer almadığı halda, 2023-cü ildə qeyri-dövlət ixracatçı subyektlərin sıralanmasında birdən-birə ilk onluqda 1-ci yeri tutub. Belə bir reytinq sıçrayışı mətbu orqanların da diqqətindən qaçmamış, “kiçik bir torpaq sahəsi belə olmayan” 2700187092 VÖEN-li fərdi sahibkar - kənd təsərrüfatı məhsulları ixracatçısı barədə təbii suallar səsləndirilmişdi.
Yayılan məlumatlara görə isə, məhkəmə baxışında olan iş üzrə Elvin Şirinovun adı əvvəllər heç yerdə keçməyən, hazırda həbsdə olan digər təqsirləndirilən Zöhrab Hidayətov tərəfindən qurulmuş böyük kölgə iqtisadiyyatı maxinasiyasının iştirakçılarından yalnız biridir. Belə maxinasiyaların pul vəsaitlərinin ölkədən başqa ad altında çıxarılması - məsələn, alınan “kənd təsərrüfatı məhsulları” formasında çıxarılması və geri qaytarılmaması məqsədləri ilə bağlı olduğu məlumdur.
Məhkəmə kollegiyası tərəfindən təqsirləndirilən şəxslər barəsində həbs qətimkan tədbirinin dəyişdirilməsi barədə qaldırılmış vəsatətlər rədd edilib və növbəti məhkəmə prosesi 31 oktyabr tarixinə təyin edilib.
