“SOCAR Georgia Petroleum” şirkətinin direktoru Nodar Kançaveli Gürcüstanın Azərbaycandan yanacaq idxalını minimuma endirməsinin səbəbini açıqlayıb.
Gürcüstan Azərbaycandan benzin və dizel - İDXALINI DAYANDIRIB
SOCAR 2023-cü ildə “Avro-5” standartlarına uyğun benzin və dizelin - İSTEHSALINA BAŞLAYACAQ
FED.az xəbər verir ki, Nodar Kançaveli “BusinessPressNews”a açıqlamasında bildirib ki, bu, Bakıda Neft Emalı Zavodunda ötən ilin martında başladılan modernzasiya işləri ilə əlaqədardır.
Onun sözlərinə görə, Gürcüstan assosiasiya sazişinə uyğun olaraq yanvarın 1-dən Avro-5 dizel standartına keçdiyindən hazırda Azərbaycandan dizel yanacağı tədarükü dayandırılıb.
Nodar Kançaveli Gürcüstanın bu ilin mayından etibarən Azərbaycandan ən yüksək standartlı yanacaq qəbul edə biləciyini qeyd edib.
“Biz dəqiq tarixi qarşıdakı həftələrdə biləcəyik”, - deyə o, əlavə edib.
Baş direktor bu vaxtadək Avro-4 standartlı yanacaq ixrac edən Azərbaycanın Gürcüstanın dizel topdansatışı bazarındakı payının 40% təşkil etdiyini bildirib.
Qeyd edək ki, Gürcüstan 2020-ci ilin 1 yanvarından etibarən Avro 5 dizel standartına keçməli idi. Lakin biznesin və idxalçıların müraciəti əsasında hökumət qərara iki dəfə bir illik moratorium tətbiq edib.
Qanunun 1 yanvar 2023-cü il tarixində qüvvəyə minməsindən sonra Gürcüstanın Rusiyadan yanacaq asılılığı 70%-dək artıb.
Gürcüstan Milli Statistika İdarəsinin hesabatına əsasən Gürcüstan 2022-ci ilin yanvar-fevral ayları ərzində Azərbaycandan 27,450 milyon dollar dəyərində 36 879 ton neft məhsulları alıb. Bu ilin ilk iki ayı ərzində isə Gürcüstan Azərbaycandan yanacaq idxalı illik ifadədə 15 dəfə azalaraq cəmi 1,9 milyon dollar təşkil edib. (Apa)
