Rusiyalı iş adamı, hazırda ABŞ-da yaşayan “Transparent Business”in baş direktoru Aleksandr Konanıxin Rusiya Prezidenti Vladimir Putinin başına pul mükafatı qoyub.
FED.az xəbər verir ki, feysbuk səhifəsində açıqladığı elanda bankir Putini həbs edəcək zabitə 1 milyon dollar verəcəyini vəd edib. O Putinin qətlinə görə də mükafat ödəməyə hazır olduğunu bildirib:
"Mən öz konstitusion vəzifəsini yerinə yetirərək Putini Rusiya qanunvericiliyinə və beynəlxalq hüquqa uyğun olaraq hərbi cinayətkar kimi həbs edəcək zabitlərə (zabitə) 1 milyon ABŞ dolları ödəyəcəyimə söz verirəm. Putin Rusiya prezidenti deyil. O hakimiyyətə xüsusi əməliyyatla Rusiyada çoxmənzilli binaların partladılması yolu ilə gəlib. Daha sonra azad seçkiləri ləğv etməklə və rəqiblərini öldürməklə Konstitusiyanı pozub. Bir etnik rus və Rusiya vətəndaşı kimi mən Rusiyanın denazifikasiyasına töhfə verməyi öz mənəvi borcum hesab edirəm. Mən Ukraynaya Putin ordusunun irəliləməsinə müqavimət göstərmək üçün apardığı qəhrəmancasına mübarizəsinə kömək etməyə davam edəcəyəm”, - deyə iş adamı bildirib. Sonradan Facebook bankirin bu paylaşımını silib.
