"Araz" Supermarket MMC-nin Sabunçu rayonu Yeni massiv 2164 ünvanında (Zabrat-Kurdaxani yolu) yerləşən mağazasının piştaxtasında istifadə müddəti bitmiş ərzaq məhsulları satılır.

FED.az xəbər verir ki, müştəri piştaxtada 22 may 2020-ci il tarixində istehsal olunmuş və istifadə müddəti 22 may 2021-ci il tarixində bitən, vaxtı keçmiş şokolad yağlarının satıldığının şahidi olub. Müştərinin satıcıya iradından sonra piştaxtadakı vaxtı keçmiş məhsullar yığışdırılıb.

Məlumatla bağlı qarşı tərəfin mövqeyini öyrənmək məqsədilə "Araz" marketlər şəbəkəsinin mətbuat məsələləri üzrə əməkdaşı Nuranə Babayevə tərəfimizdən göndərilən sorğunu cavablandırıb.

N.Babayeva bildirib ki, hər şeydən əvvəl yaranmış vəziyyətlə bağlı təəssüf hissi keçiririk. “10 ildir ki, müştərilərinin qida ehtiyacını qarşılayan “Araz” supermarketlər şəbəkəsi müştəri məmnuniyyətini hər şeydən üstün tutur. “Araz” marketlər olaraq qida və qeyri-qida məhsullarının satışını həyata keçiririk və satışını həyata keçirdiyimiz məhsulların keyfiyyətinə, xüsusilə diqqət edirik. Məhsulun satıldığı gündən 1 gün qabaq mağazada sayım olub və sayım qrupu tərəfindən bu müddəti bitmiş məhsullar çıxardılaraq kənara qoyulub. Marketin yeni əməkdaşı səriştəsizlik edərək həmin malları yenidən rəfdə sərgiləyib. Nəticədə, belə bir təəssüf doğurucu hal yaşanıb. Ümumiyyətlə, bütün marketlərimizdə tarixə nəzarət jurnalları var və həmin jurnal əsasında rəflərdəki müddətinə az qalmış məhsullar yığışdırılaraq iadə edililir. 

N. Babayevanın sözlərinə görə, “Araz” marketlərdə müştəri hüquqlarının əks olunduğu 4 bənddən ibarət lövhələr asılıb. Bu lövhədə alınan malların geri qaytarılma, təzə məhsul, çap xətası və qiymət etibarlılığı əks olunub. Marketimizdə alış-veriş zamanı istifadə müddəti bitmiş məhsul aşkar olunarsa, yeni məhsul ödənişsiz olaraq hədiyyə verilir. Həmçinin müştəri hüquqları ilə bağlı sosial media hesablarımızda da  maarifləndirici paylaşımlar edilir.

Qeyd edək ki, ölkədə qidaların təhlükəsizliyinə nəzarətin edilməsi ilə bağlı Prezident İlham Əliyev 2017-ci fevralın 10-da yeni bir qurum, Azərbaycan Respublikası Qida Təhlükəsizliyi Agentliyinin yaradılması haqqında fərman imzalayıb.

Məsələyə münasibət öyrənmək üçün redaksiya tərəfindən AQTA-nın mətbuat katibi Aysel Fərziyevaya müvafiq sorğu ünvanlanıb.