Korporativ İT infrastrukturu üzrə ixtisaslaşan ONYX MMC Cənubi Koreyada keçirilən World Smart City Expo 2026-da Azərbaycanı "Global Buyer" statusunda təmsil edib və Koreya istehsalçıları ilə birbaşa tədarük danışıqlarına başlayıb.

FED.AZ xəbər verir ki, Azərbaycanın korporativ İT bazarında fəaliyyət göstərən ONYX MMC 9–11 sentyabr tarixlərində Cənubi Koreyanın Busan şəhərində keçirilən World Smart City Expo (WSCE) 2026 sərgisində ölkəmizi rəsmi "Global Buyer" (qlobal alıcı) statusunda təmsil edib.

Bu il 10-cu dəfə təşkil olunan WSCE Asiyanın "smart city" istiqaməti üzrə ən iri tədbiri sayılır. Sərgi BEXCO sərgi mərkəzində Koreyanın Torpaq, İnfrastruktur və Nəqliyyat Nazirliyi, Elm və İKT Nazirliyi və Busan şəhər meriyasının birgə təşkilatçılığı ilə "Beyond Smart City, Into AI City" şüarı altında keçirilib. 277 şirkət və təşkilat süni intellekt, nəqliyyat və mobillik, ictimai təhlükəsizlik, fövqəladə halların qarşısının alınması, energetika və səhiyyə üzrə həllərini nümayiş etdirib.

Sərgi ilə paralel təşkil olunan K-ICT WEEK in BUSAN 2026 isə AI KOREA, CLOUD EXPO KOREA və IT EXPO BUSAN platformalarını bir araya gətirib. Burada Koreya istehsalçılarının bulud infrastrukturu, korporativ server və şəbəkə avadanlığı, süni intellekt əsaslı video analitika və kibertəhlükəsizlik məhsulları təqdim olunub.

15 ölkə, 40 alıcı, bir Azərbaycan masası

Tədbirin biznes hissəsi — Global Buyer Business Meeting proqramı — 15 ölkədən 40-a yaxın xarici alıcının Koreya istehsalçıları ilə əvvəlcədən planlanmış fərdi görüşlərindən ibarət olub. Azərbaycan bayrağı ilə işarələnmiş 37 nömrəli masada ONYX MMC-nin baş direktoru Anar Şahbazov danışıqlar aparıb.

Bu formatın praktiki mənası ondan ibarətdir ki, alıcı şirkət istehsalçı ilə regional distribyutor zənciri olmadan, birbaşa təmasda olur. Azərbaycan bazarında korporativ avadanlıq tədarükünün əsasən məhdud sayda ənənəvi kanalla həyata keçirildiyini nəzərə alsaq, belə birbaşa əlaqələr həm texnoloji seçimi, həm də qiymət və çatdırılma şərtlərini genişləndirir.

"Azərbaycanda smart city, yol təhlükəsizliyi və data mərkəzi layihələrinə tələbat artır, lakin təchizat kanalları hələ də dardır. Koreya istehsalçıları ilə birbaşa əlaqə müştərilərimizə daha geniş seçim və daha çevik şərtlər təklif etmək imkanı verir. Busandakı görüşlərin məqsədi məhz bu kanalı açmaq idi.," — deyə Anar Şahbazov, ONYX MMC-nin baş direktoru bildirib.

Piyada keçidində süni intellekt

Görüşlərdən biri yol təhlükəsizliyi və intellektual nəqliyyat sistemləri üzrə ixtisaslaşan Busan şirkəti SB Security Ltd-nin baş direktoru Osoo Zeh ilə olub. Şirkətin iki həlli müzakirə edilib: günəş enerjisi ilə işləyən LED yol işarələmə sistemi (Solar Eyes) və svetoforlarla inteqrasiya olunan, süni intellekt əsaslı smart piyada keçidi (AI-EYES-CW). İkinci sistem piyadanı keçiddən əvvəl aşkarlayır və sürücünü işıq siqnalı ilə xəbərdar edir.

Tərəflər bu həllərin Azərbaycan bazarına, o cümlədən bələdiyyə və infrastruktur layihələrinə uyğunlaşdırılması imkanlarını müzakirə ediblər.

Serverlər və bulud infrastrukturu

Səfər çərçivəsində Koreya istehsalçılarının yüksək əlçatanlıqlı (HA) server platformaları, korporativ şəbəkə avadanlığı və bulud infrastrukturu həlləri ilə də tanışlıq keçirilib. Bu seqment ONYX-in əsas fəaliyyət istiqamətidir: şirkət Azərbaycanda korporativ müştərilərə server, şəbəkə və təhlükəsizlik avadanlığının tədarükü, server otağı və data mərkəzi layihələrinin həyata keçirilməsi üzrə xidmət göstərir.

Şirkətdən bildirilib ki, Busandakı təmaslar növbəti mərhələdə texniki sınaq və pilot layihə müzakirələri ilə davam etdiriləcək.

ONYX haqqında

ONYX MMC — Azərbaycanda korporativ İT infrastrukturu üzrə ixtisaslaşan şirkətdir. Əsas istiqamətlər: server, məlumat saxlama, şəbəkə və kibertəhlükəsizlik avadanlığının korporativ tədarükü, proqram lisenziyalarının təminatı, ofis və filialların "açar təslim" İT quraşdırılması, server otağı və data mərkəzi layihələri, bulud miqrasiyası, həmçinin abunə əsaslı idarə olunan İT dəstəyi (managed IT).

Qeyd edək ki, Şirkət Cisco, Dell, HP, Lenovo, Fortinet, Microsoft kimi istehsalçıların həlləri ilə işləyir.

Ətraflı məlumat: onyx.az · WhatsApp: +994 55 310 20 40