Ukrayna hücumla bağlı Rusiyaya tətbiq edilən sanksiyalar ölkə iqtisadiyyatı ilə yanaşı, ayrı-ayrı sahələrə də təsirini göstərir. 

Eləcə də bax: Finlandiyanın təkər istehsalçısı Rusiyada 300 işçini - İXTİSAR EDİR

FED.az xəbər verir ki, Qərb istehsalçılarının bazardan çıxması səbəbindən Rusiyanın avtomobil şinləri bazarına yeni oyunçular daxil olacaq.

İranın Təkər Sənayesi Gildiyaları Assosiasiyasının rəhbəri Həmidreza Abdülmaleki artıq şinlərin ixracı üçün Rusiya ilə müqavilələrin imzalandığını bildirib.

Qeyd edək ki, İran - Yaxın Şərq ölkələri arasında ən böyük şirn istehsalçılarnıdan biridir. Hər il ölkədə 20 milyon avtomobil şini istehsal edilir. Müqayisə üçün bildirək ki, Rusiyanın şin istehsalı ildə 50 milyon ədəddir. İran istehsalı olan «Goldstone» şinlərindən əsasən yerli avtomobil şirkətləri – «SAIPA» və «Khodro» istifadə edir. 

İranın digər brendi «Pirozhi Tire» isə istehsalda İtaliyanın «Pirelli» şirkətinin texnologiyasından istifadə edir. Digər İran brendi «Barez» isə alman şirkəti «Continental»ın texnologiyasına əsaslanır. 

İran şin istehsalçıları daxili bazarla yanaşı, qonşu ölkələri – Əfqanıstan, İraq, Azərbaycan və Ermənistanı da şinlə təmin edirlər. 

Hələlik Rusiya bazarına İranın hansı şirkətlərinin daxil olacağı məlum deyil. Amma İran şirkətləri Rusitya bazarında çinlilərlə rəqabət aparmalı olacaq, hazırda bazarın 30%-nə məhz Çin şirkətləri nəzarət edir. Təkcə ilk yarım ildə Çindən Rusiyaya 11 milyon ədəd avtomobil şini gətirilib.