Fevralın 15-də Aqrar Sığorta Fondunda (ASF) Azərbaycanda səfərdə olan Türkiyə Respublikasının Kənd Təsərrüfatı sığortaları sistemi – TARSİM-in nümayəndə heyəti ilə aqrar sığorta sisteminin üzvü olan sığorta şirkətlərinin təmsilçilərinin görüşü keçirilib.
Görüşdə «Paşa Sığorta», «Meqa Sığorta», «Azsığorta», «Azərbaycan Sənaye Sığorta», «Xalq Sığorta», «Qala Sığorta» və «Bakı Sığorta» şirkətlərinin nümayəndələri iştirak edib.
Qeyd edək ki, TARSİM İdarə Heyətinin sədri Kərim Üstünün rəhbərliyi ilə nümayəndə heyəti Azərbaycanda səfərə gəlib. Nümayəndə heyətinə TARSİM İdarə Heyətinin sədr müavini Mete Güler, TARSİM İdarə Heyətinin Üzvü və Baş Meneceri Serpil Günal, TARSİM İdarə Heyətinin üzvü Bekir Engürülü və TARSİM baş direktor müavini Tufan Özel də daxildir.
Səfərdə məqsəd Azərbaycanda TARSİM-in dəstəyi və təcrübəsindən istifadə etməklə yaradılan aqrar sığorta mexanizminin fəaliyyəti ilə tanışlıq, sistemin fəaliyyətə başlamasından ötən müddət ərzində əldə edilən nəticələrin təhlili, təcrübə mübadiləsi, eləcə də Azərbaycanın bu təcrübəsinin başqa ölkələrdə tətbiqi imkanlarını müzakirə etməkdir.
Sığorta şirkətlərinin təmsilçiləri ilə görüşdə aqrar sığorta mexanizmində vasitəçi şirkətlərinin rolu, bununla bağlı Türkiyə təcrübəsi, vasitəçi şirkətlər tərəfindən satışların idarə olunması və digər məsələlər müzakirə edilib. Toplantıda vasitəçi şirkətlərlə bağlı təkliflər səsləndirilib, dünya təcrübəsi barədə məlumat verilib, eləcə də sığorta sektoru nümayəndələrinin təklifləri dinlənilib.
Xatırladaq ki, səfər zamanı TARSİM rəhsmiləri Kənd Təsərrüfatı Nazirliyində, Aqrar Sığorta Fondunda görüşlər keçirib, Türkiyənin Azərbaycandakı səfirliyini ziyarət edib.
Fevralın 16-17-də Türkiyə nümayəndə heyəti işğaldan azad edilmiş Zəngilan rayonuna səfər edərək rayonun kənd təsərrüfatı imkanları və Ağalı kəndində həyata keçirilən «Ağıllı kənd» layihəsi ilə tanış olacaqlar.
Eləcə də TARSİM rəhbərliyi Gəncə şəhərinə gedərək Azərbaycan Dövlət Aqrar Universitetində təşkil edilmiş tədbirdə iştirak edəcək, eləcə də 2020-ci il 2-ci Qarabağ müharibəsi zamanı həlak olan Gəncə sakinlərinin xatirəsini yad edəcək.
