Masallı rayonunda da arıçılıqla məşğul olanların və arı ailələrinin sayı ilbəil artır.
Eləcə də bax: Azərbaycanda bal - NİYƏ BAHALAŞIB?
Masallı arıçıları bu günlərdə son süzümü aparırlar. 250 arı ailəsi olan Ərkivan kənd sakini Qönçə Quliyeva artıq balın bir qismini süzüb. Deyir ki, builki bal ötən ildəkindən 20-30 faiz çox olduğundan süzüm mərhələ-mərhələ aparılır: “Arıçılığa iki arı ailəsi ilə başlamışam. Hazırda 250 arı yeşiyim var. Üç gündür ki, bal süzürük. May balını da süzmüşdük. Amma indi bütün çiçəklərin nektarları toplanıb. Hazırda müalicəvi çiçəklərdən toplanan balı süzürük. Pətəklərimizi də görürsüz, doludur. Bir yeşikdən 20 kiloqram bal alırıq. Ötən il isə 12-15 kiloqram götürürdük. Yaz aylarında yağıntı çox olduğundan çiçəklər yaxşı nektar verdi, nəticədə arılar da yaxşı işlədi və məhsuldarlıq bol oldu”.
Arıçı Asim Quliyev: “Biz bu il arıları digər rayonlarla yanaşı, Lerikə də apardıq. Lerik təbiətində çiçəklər zəngindir, müalicəvi xüsusiyyətləri çoxdur. Görürsünüz, pətəklər doludur, hamısı Lerik balıdır. Hazırda Lerik balının süzümünü aparırıq. Çox keyfiyyətlidir. Bu cür məqamlar qiymətə də təsir göstərir. Lerik balı sırf müalicəvi çiçəklərdən toplandığına görə əlbəttə ki, qiymətə də təsir edəcək”.
Pətəklərdən balın hamısı götürülmür, arıların qış yemi üçün də saxlanılır. Bu, həm də sağlam beçəvermə üçün vacibdir.
Qönçə Quliyeva qış yemindən danışarkən bildirib ki, arılar üçün yalnız təbii bal saxlanmalıdır: “Bunlar qışlamaya saxladığımız güləmli çərçivələrdir. Hamısı təbii baldır. Arı qışdan təbii balla çıxanda çox keyfiyyətli olur. Hazırda qış üçün 8 çərçivə bal saxlamışıq”.
Hər arı pətəyinə görə subsidiyanın verilməsi məhsul istehsalçılarının bu sahəyə marağını daha da artırıb. Masallıda 539 arıçıya 11 min 521 arı ailəsi üzrə subsidiya ödənilib.
“Sağ olsun dövlətimiz, bizə subsidiya ayırır. Həmin subsidiya arıçıları həvəsləndirir. Arı yeşiklərinin sayını artırmağa çalışırıq. İstəyirik ki, balı alıcılar üçün sərfəli qiymətə sataq ki, hər kəsin evində bal olsun. Bu il Lerik balını müalicəvi xüsusiyyətinə görə 40-50 manata satırıq”, - deyə arıçı əlavə edib. (Marja)
Bu il təkcə Qönçə Quliyeva arıçılıq təsərrüfatından ötən ildəkindən 1 ton çox, 3 tona yaxın məhsul götürüb. İndi qalır əsas məsələ - balın satışı. Düzdür, ildə bir dəfə respublika sərgi-satış yarmarkası keçirilir. Amma bu, arıçılara məhsullarını satmaq üçün kifayət etmir. Onların istəyi yarmarkanın ildə bir neçə dəfə keçirilməsidir.
Asim Quliyev də yarmarkaların sayının artırılmasını istəyir: “Məhsulumuz bu il boldur. Böyük çənlərin hamısı doludur. Satışımızı əsasən Bakıda təşkil olunan yarmarkada aparırıq. Amma yarmarkanın ildə bir dəfə olması azdır. Arzu edirik ki, başqa rayonlarda da sərgi-satış yarmarkaları keçirilsin. Son illər arıçıların da sayı artıb, məhsuldarlıq da”.
Qeyd edək ki, bu il Masallı rayonunda arıçılıq təsərrüfatlarının sayı 642, arı ailələrinin sayı isə 9711-ə çatıb. (Azərtac)
