Bir neçə il əvvəl cənub bölgəsində əkilib-becərilməsinə başlanan hallabonq qış aylarında yetişir. Görünüşü, dadı, ətri və məhsuldarlığına görə digər sitrus meyvələrindən fərqlənir. Bu il rayon üzrə 60 tondan çox hallabonq tədarükü gözlənilir.
FED.az biznes və maliyyə xəbərləri portalı AZƏRTAC-a istinadən xəbər verir ki, Lənkərana Cənubi Koreyadan gətirilən hallabonq tingləri ilk dəfə rayonun Sütəmurdov kəndi ərazisində 15 hektar sahədə əkilib. Nəticə ürəkaçan olduğundan sahələr ilbəil genişləndirilərək, 78 hektara çatdırılıb.
Bu meyvənin indi yığım dövrüdür. Hallabonq kütləvi şəkildə deyil, hissə-hissə dərilir və bazarlara çıxarılır.
İşçi Şükufə Tahirova bildirib ki, bu meyvənin yığımı da insana zövq verir: “Bağda işləməkdən yorulmuruq. Hər işçi günə 50-60 vedrə meyvə yığır. Bağımız bu il də barlıdır. Görürsünüz, məhsul da boldur. İşləyirik, gündəlik qazancımız çıxır”.
Dekabrın axırlarından yığıma start verilən təsərrüfatdan bu günədək 50 tona yaxın məhsul yığılıb. Hələ bağlardan daha 10 ton məhsul toplanması gözlənilir.
Meyvə bağının aqronomu Xalıq Talıbov isə qeyd edib ki, bu ağaclar altı il əvvəl əkilib. “Ağaclar 8-10 ilə tam məhsuldarlığa düşür. Hər ağacdan 15-20 kiloqram məhsul yığırıq. Hektarda da 500 ağac olur. Təxminən hər hektara 30-35 ton məhsul götürə biləcəyik. Hallabonq ağacları uzunömürlüdür. Amma xəstəlik və zərərvericilərdən, soyuqdan qorumaq lazımdır. Soyuqdan qorumaq üçün ağacları polietilen örtüyə almışıq”, - deyə o vurğulayıb.
Ümumiyyətlə hallabonq ağacları 8-10, meyvəsi isə 2-3 dərəcə şaxtaya dözə bilir. Meyvəsinin çəkisi 350-400, bəzən də 500-600 qram olur. Digər sitrus meyvələrindən sonra yetişməsi bazarlarda hallabonqa yüksək alıcılıq qazandırır.
Təsərrüfatın baş nəzarətçisi Vahab Əmirli ilə söhbət zamanı məhsulun əsasən yerli bazara çıxarıldığını bildirib: “Satış daxili bazarda olduğu üçün bir az zəif gedir. Ancaq xaricə çıxsaq, gəlirimiz də artar. Hələ ki, müraciət yoxdur. Malımız da, tədarük etməyə imkanımız da var. Bu meyvə demək olar ki, ikinci ildir respublika bazarında tanınır. Alıcı tələbatı da get-gedə artır”.
Qiymətlər meyvənin ölçüsünə görə 1 manat - 2 manat 50 qəpik arasında dəyişir. Xoş ətrə, gözəl dada malik olan bu meyvədən qənnadı, kosmetika, ətriyyat, şirə və şərabçılıq sahələrində geniş istifadə edilir.
