Kiçik pambıq təsərrüfatları üçün nəzərdən tutulan yeni kombaynların sınaq mərhələsi davam edir. Biləsuvar rayonundan sonra bu texnika Goranboy rayonunda sınaqdan keçirilib.
Eləcə də bax: Azərbaycanda pambıqçılıq tarixində ən yüksək göstəricilərdən biri qeydə alınıb
Bu barədə FED.az-a Kənd Təsərrüfatı Nazirliyindən bildirilib.
“Case New Holland Industrial” şirkəti ilə "Aqroservis" ASC-nin birgə təşəbbüsü və Kənd Təsərrüfatı Nazirliyinin dəstəyi ilə yeni nəsil “Case” kombaynlarının pambıq sahələrində sınaq yığımları mərhələsinə xanım mexanizator da cəlb edilib.
”Aqroservis”in Ağsu rayon bölməsində 4 il mexanizator olaraq çalışan Nəzakət Abuzərova bildirib ki, yeni nəsl kombaynlarının idarə edilməsi çox asandır. Belə ki, texnikanın yüngül və kiçik həcmli olması onun sahədə yaxşı manevr etməsinə və pambığın operativ yığılmasına imkan verir.
Azərbaycana gətirilən yeni nəsil kombaynlar ölkəmizdə fəaliyyət göstərən kiçik pambıq təsərrüfatlarının ehtiyaclarına uyğunlaşdırılıb. Bu layihə Azərbaycandakı kiçik fermerlərə pambıq yığımında dəstək olmaq məqsədi daşıyır. Yeni nəsil “Case” kombaynları ölkəmizdə mövcud olan digər kombaynlardan fərqli olaraq 2 sıralıdır və alternativi yoxdur. Kombaynın çəkisi az və ölçüsü yığcam olduğundan sahələrarası daşınması çox rahatdır. Eyni zamanda, ölçü və çəkisinin digər kombaynlarla müqayisədə az olması bu kombaynlara sahələrdə daha yaxşı manevr etməyə imkan verir. Bu kombaynlar daha az yanacaq sərf etdiyindən digər kombaynlarla müqayisədə istismar xərcləri azalır.
Bundan başqa, bu kombaynların ehtiyyat hissələrinin kompakt və asan konstruksiyası onlara daha rahat və tez başa gələn texniki qulluq göstərilməsinə imkan verir. Mütəxəssislər hesab edir ki, yeni nəsil kombaynın Azərbaycanın fermelərinin ehtiyaclarına uyğunlaşdırılması pambıq yığımında səmərəliliyin artırılması ilə nəticələnəcək.
