"Azərbaycan Sənaye Korporasiyası" ASC (ASK) bu il rəhbərlik etdiyi müəssisələrdə struktur dəyişikliyi etməyə hazırlaşır. FED.az iki istiqamətdə dəyişiklik faktı müəyyən edib. Korporasiyanın pambıq müəssisələri "Gilan Holdinq"in nəzarətinə keçir.

Mayın 25-də "Azərpambıq Aqrar Sənaye Kompleksi" MMC yaradılıb. Bəhruz Camalov şirkətin direktoru təyin olunub. O, "MKT İstehsalat Kommersiya" şirkətinin baş direktorunun müavinidir. Bu şirkət Azərbaycanda pambıqtəmizləmə zavodlarının üçdə ikisinə, Bakıda və Gəncədə iki tekstil müəssisəsinə malikdir. Müəssisələr ASK-nın balansına keçiriləndən əvvəl dövlətə məxsus "Aqrarkredit" BOKT tərəfindən idarə olunurdu. 2017-ci ilin iyul ayında o, "CTS-Agro" MMC-nin pambıqçılıq zavodlarının idarə olunması üçün 82,3 milyon manat kapitalla "Azərpambıq" MMC-ni təsis edib. CTS-Agro-nun illik 60 min ton gücü olan altı pambıqtəmizləmə zavodu var. http://cts-agro.az/az/about.

"CTS-Agro" MMC-nin direktoru Zakir Əzimovun sözlərinə görə, hazırda sənədlərin təhvil-təslim prosesi davam edir. Z. Əzimov özü istefa ərizəsi yazıb.

Tütünçülük sahəsində də oxşar proseslər gedir. Həmin gün (25 may) "Azərtütün Aqrar Sənaye Kompleksi" MMC yaradılıb. Yeni şirkət ölkənin şimal bölgələrində tütün fermentasiyası zavodlarını və tütün yetişdirilməsini idarə edəcək. 2017-ci ilin iyulunda 30,1 milyon manat kapitalla "Azərtütün" MMC təsis edilib.

ASK-nın korporativ veb saytında http://ask.gov.az/about korporasiyanın struktur bölmələri barədə məlumat yoxdur. Müəssisənin yeganə telefonu zənglərə cavab vermir.