Saatlıda innovativ üsulla becərilən pomidor sahəsində payızlıq məhsul yığımı davam edir. Mövsüm başlayandan bəri iki hektar sahədən 80 tondan çox məhsul yığılıb.
FED.az xəbər verir ki, müasir üsulla becərilən sahə Saatlı rayonu Qaralar kəndi ərazisində yerləşir. İki hektarı əhatə edən payızlıq pomidor sahəsində 55 min şitil əkilib. Fermer Həbib Əhədov deyir ki, sahə innovativ üsulla, yəni damcı suvarma sistemi ilə becərilib. Bu suya qənaətlə bərabər, həm də bol məhsul əldə etməyə imkan verib.
Pomidor şitilləri ilə bərabər ərazidə 20 sot sahədə “Kapia” sortundan olan bibər əkilib-becərilib. Pomidor isə “Lajin” sortudur. Bu sortlar iqlim şəraitinə uyğunlaşması ilə bərabər, həm də məhsuldarlığı ilə seçilir. Həmçinin daha keyfiyyətli olduğu üçün alıcıların da çox müraciət etdiyi məhsul sayılır.
Çəkilən əziyyət bəhrəsini də verib. İyun ayında əkilən şitillərdən sentyabr ayının əvvəlindən məhsul yığımına başlanılıb. Ötən dövrdə 80 tondan çox pomidor, 10 ton bibər tədarük olunub.
Yığılan məhsul əsasən yerli bazarlara çıxarılır. Hazırda məhsul yığımı davam edir, növbəti günlərdə isə sahədən əlavə 20 ton məhsul tədarükü gözlənilir.
Sahə aqronomu Valeh Məmmədov bildirib ki, tərəvəz sahəsinin digər əlverişli cəhəti təkrar əkin olmasıdır. “Bu sahədə əvvəl arpa əkilmişdi. Biçindən sonra lazımi aqrotexniki qaydalara əməl olunmaqla şumlanaraq mala çəkildi və damlama sistemi qurularaq torpağa üç gün müddətində su verildi. Daha sonra şitillər sahələrə köçürüldü. Nəticədə isə bir mövsümdə iki dəfə əkin aparıldı. Həm bol məhsul, həm də əlavə qazanc əldə edildi. Bir sözlə, əlavə gəlir götürmək istəyən təkrar əkin aparmalıdır”, - deyə Valeh Məmmədov qeyd edib.
Əkin sahələrinin mövcud olması kənddə, həmçinin əlavə iş yerlərinin açılmasına da şərait yaradıb. Belə ki, Qaralar kəndi ilə bərabər, qonşu kəndlərdən olan sakinlər də əkin sahələrində çalışma imkanı əldə ediblər. (Azərtac)
