Azərbaycanda dövlət dəstəyi ilə təqdim olunan aqrar sığorta mexanizmi çərçivəsində çiyələk əkinlərinin sığortalanmasına başlanılıb.
FED.az xəbər verir ki, Aqrar Sığorta Fondunun məlumatına görə, bu təsərrüfatların sahibləri əkinlərini 50 faiz güzəştli şərtlərlə sığorta edə bilərlər.
Qeyd edək ki, ümumilikdə təkcə cənub bölgəsində 1500 hektara yaxın çiyələk əkini mövcuddur. Quba-Xaçmaz və Qazax-Tovuz regionlarında da 400 hektardan artıq çiyələk sahəsi salınıb. Çiyələk bağlarında orta məhsuldarlıq hektardan təqribən 10 ton təşkil edir. Ən böyük məhsuldarlıq isə Cəlilabadda müşahidə edilir – hektardan 32 tona yaxın.
Çiyələyin əkini və yetişdiyi dövr ilin mürəkkəb iqlim şəraitinə təsadüf edir. Yaz ayları çoxsaylı təbiət hadisələri ilə zəngindir, təsadüfi deyil ki, iqlimi nisbətən sakit olan cənub bölgəsində də yaz aylarında baş verən güclü yağışlar və selsubasma çiyələk sahələrinə zərər vurur, fermerləri ziyana salır.
Təklif olunan sığorta zərfləri, təminat verilən risklər barədə ətraflı məlumatla Fondun rəsmi səhifəsindən (asf.gov.az) tanış olmaq olar.
