Hazırda Cəlilabad rayonunun Maşlıq, Muğan və Söyüdlü kəndlərində istixana şəraitində yetişdirilən kartofun yığımı aparılır.
Bölgələrdə 70 qəpikdən satılan xiyar paytaxt bazarlarında nə vaxt ucuzlaşacaq? - VİDEO
FED.az xəbər verir ki, fermerlərin verdiyi məlumata görə, yığımın əvvəlində örtük altında yetişdirilən kartofun qiyməti 1 manat 30 qəpikdən etibarən satılmağa başlayıb. Lakin son günlər təklif olunan qiymət onları narazı salıb.
"Kartof məhsulunun becərilməsi çox xərc aparır. Kartofun sortundan asılı olaraq 1 hektar faraş kartof sahəsinə 7-9 min manat vəsait xərclənir. Hazırda təklif olunan qiymət bizi qane etmir. Çünki məhsulu alan sahibkarlar kartofu bizdən 80-90 qəpiyə istəyir. Lakin bu qiymət xərclərimizi belə qarşılamır. Heç olmasa, 1 manat civarında qiymət qalarsa, müəyyən qədər vəziyyətdən çıxmaq olar", - onlar vurğulayıblar.
Məsələ ilə bağlı Cəlilabad Rayon Dövlət Aqrar İnkişaf Mərkəzindən bildirilib ki, hazırda minə yaxın fermer kartof məhsulunu çıxarmağa başlayıb.
"Hər gün Rusiya bazarlarına 200-250 ton kartof göndərilir. O ki qaldı qiymət məsələsinə, bununla bağlı alıcılarla söhbət aparılıb və alış qiymətinin 1 manat civarında qalması təmin olunub. Lakin gələcəkdə açıq sahələrdə kartof çıxarılması zamanı məhsul bolluğu ilə əlaqədar qiymətlərin enməsi müşahidə oluna bilər", - məlumatda qeyd olunub.
Qeyd edək ki, ötən il Cəlilabad rayonunda sahələrdən 160 min tona yaxın kartof məhsulu tədarük edilib. (Report)
