Banner

Aqrar

«Azəriqaz» istixana sahiblərinə - GÜZƏŞTƏ GETDİ - ŞƏMKİRDƏ TOPLANTI

«Azəriqaz» istixana sahiblərinə - GÜZƏŞTƏ GETDİ - ŞƏMKİRDƏ TOPLANTI | FED.az
00:04 12 Noy 2019

Şəmkir rayonunda “Azəriqaz” İB-nin baş direktoru Ruslan Əliyev bir qrup istixana sahibi ilə görüşüb.

Eləcə də bax: Şəmkirdəki parniklər bağlanır: «Qaz pulunu ödəyə bilmirik» - SAHİBKARLARDAN ETİRAZ

“Azəriqaz” İB-dən FED.az-a verilən məlumata görə, görüşdə Şəmkir Rayon İcra Hakimiyyətinin başçısı Alimpaşa Məmmədov, Azərbaycan Meyvə-Tərəvəz İstehsalçıları və İxracatçıları Assosiasiyasının sədri Bəşir Quliyev və Kiçik və Orta Biznesin İnkişafı Agentliyinin idarə heyətinin sədr müavini Faiq Abbasov da iştirak ediblər.

Meyvə-tərəvəz istehsalı ilə məşğul olan 80-dən çox istixana sahibinin problemləri dinlənilib. Diqqətə çatdırılıb ki, hazırda “Azəriqaz” İB-nin Şəmkir Regional qaz istismarı İdarəsinin xidmət sahəsinə daxil olan 132 böyük istixana sahibi qazla təmin edilir. Onlardan təkcə 111-i Şəmkir rayonunun payına düşür.

Xatırladaq ki, Şəmkirdəki istixana sahibləri 2016-cı ildə qazın qiymətinin iki dəfə artırılaraq 10 qəpikdən 20 qəpiyə qaldırılmasından, eləcə də, qaz kəmərlərində sayğac və tənzimləyicilərin yerinin dəyşidirilməsindən şikayət edirlər. 
Onların fikrincə, bu dəyişiklik nəticəsində onlar qazın kubmetri üçün 20 qəpik əvəzinə, 40-50-60 qəpik ödəməli olurlar. 
Nəticədə iki il əvvəllə müqayisədə sahibkarların qaz pulu xərcləri 3-4 dəfə yüksəlib. Bəzi sahibkarlar bu səbəbdən məhsullarını satmaqda və bankdan götürdükləri kreditləri ödəyəməkdə çətinlik çəkirlər. Şəmkirdəki istixanalardakı problemlər barədə daha ətraflı buradan oxuyun.

Görüşdə sahibkarlar əsasən istixanalara verilən qazın hər kubmetrinə görə qiymətin 20 qəpikdən 10 qəpiyə endirilməsini, borclarla bağlı güzəştlərin olunmasını, qaz sayğacı tənzimləyicilərinin yerinin dəyişdirilməsi və sair məsələlərlə bağlı fikirlər səsləndiriblər.

“Azəriqaz” İB-nin baş direktoru Ruslan Əliyev bildirib ki, bundan sonra istixana sahibləri ilə təkcə Şəmkir rayonunda deyil, digər regionlarda da hər ay azı bir dəfə görüş keçiriləcək. “Bu görüşlər əsasən mövsümi işlərin görüldüyü (noyabrın 1-dən aprelin 1-dək) dövrü əhatə edəcək. Sayğac tənzimləyicilərinin yeri isə sahibkarın öz istəyinə uyğun olaraq Birliyin hesabına dəyişdiriləcək.

Borclu sahibkarların qazı mövsüm boyu açılacaq. Lakin borc mübahisələri daha sonra qarşılıqlı müzakirələr əsasında nəzərdən keçiriləcək”.

R.Əliyev onu da əlavə edib ki, qazın satış qiyməti ilə bağlı məsələlər Birliyin səlahiyyət dairəsinə aid deyil, bu barədə qərarlar Tarif Şurası tərəfindən qəbul olunur. “Azəriqaz” İB abonentlərin keyfiyyətli və texnoloji rejimə uyğun təbii qazla təchizatını həyata keçirir.

Görüşdə iştirak edən digər qurumların nümayəndələri də bir sıra məqamlara toxunublar. Şəmkir Rayon İcra Hakimiyyətinin başçısı Alimpaşa Məmmədov qeydə alınan məsələlər barədə Baş Nazir Əli Əsədova və digər qurumlara rəsmi məktub hazırlandığını diqqətə çatdırıb.

Xatırladaq ki, Şəmkirdə fəaliyyət göstərən bir qrup istixana sahibi bu günlərdə sosial şəbəkələrdə bir sıra narazılıqları dilə gətirərək videomaterial paylaşıb. “Azəriqaz” İB baş verənlərə dərhal reaksiya verərək, onlarla görüşmək təşəbbüsü ilə çıxış edib.

Digər xəbərlər

Banner