Lənkəranın İstisu qəsəbəsində böyük “Sitrus Bağı” salınıb. Ərazidə kivi, kinkan, qreyfrut, feyxoa kimi müxtəlif ağaclar əkilib. Ömrünün 32 ilini müəllimliyə həsr edən Rəftarə Şükürova ailə təsərrüfatı yaradaraq həmkəndlilərinin dolanacaq imkanlarını artırıb. Rəftarə xanımın 15 hektar sahədə yaratdığı sitrus vadisində digər sitrus ağacları ilə yanaşı, 3 hektardan çox “ekzotik” meyvə sayılan kivi bağı var. 2000 ağacın əkildiyi bu bağdan 6-cı ildir ki, kivi yığılır.
Astara sakinləri çıxılmaz vəziyyətdə: Məhsullar məhv olur - VİDEO
Təsərrüfatın daimi işçiləri olsa da, sitrus yığımı zamanı 10-dan çox qəsəbə sakini buradan çörək pulu qazanır. Qadınlar bağda yorulmadan çalışırlar. Onlardan biri də Gülgəz Cabbarovadır. Dediyinə görə, bağda uzun müddətdir işləyir:
– Hər il yığım mövsümü başlanan kimi burada əl-ələ verərək ağacların barını toplayırıq. Haqqımızı da təhvil verdiyimiz məhsulun müqabilində gündəlik alırıq. İndi artıq iki ay olar ki, yığım başa çatıb. Mən günə 300 kiloqramdan çox kivi yığmışam. Yaxşıdır, işimdən razıyam. Sitrusçuluq yerli sakinlər üçün yaxşı qazanc mənbəyidir.
Təsərrüfat sahibi Rəftarə Şükürovanın dedikləri onun əsl təsərrüfatçı olduğundan xəbər verir:
– Bu il kivi yığımına çox erkən başlamış və uğurla başa çatdırmışıq. Yığımı seçmə üsulu ilə aparmışıq. Məhsuldarlıq yaxşı olub. Mövsüm ərzində bağdan 40 tona yaxın keyfiyyətli kivi toplanıb. Dərilən məhsul maşınlara yüklənərək, əsasən, xarici bazarlara göndərilib. Kiloqramı 1 manat 50 qəpiyə satılıb. Kivi ilə yanaşı, 6 hektar feyxoa bağımız da var. Qalan sahədə isə taxıl əkirik.
Qeyd edək ki, ötən dövrdə Lənkəranda ümumilikdə 11 hektardan artıq kivi bağları salınıb. Astara, Masallı və Balakəndə də kivi bağları var. Astara özünün feyxoa, kivi, portağal və mandarini ilə məşhurdur. Şahağacı, Ərçivan və digər kəndlərdə şəxsi təsərrüfatlar çoxdur. 2500 hektarda yeni salınmış sitrus bağlarında suvarma, ilkin olaraq, damcı üsulu ilə həyata keçirilir. Sonrakı mərhələlərdə çiləmə və daha mütərəqqi suvarma üsullarından da istifadə edilməsi nəzərdə tutulub.
Siyəku kəndində əhalinin yarıdan çoxu ruzisini sitrus meyvəçiliyindən əldə edir. Kənd sakini Osmanağa Qurbanov deyir ki, pandemiya zamanı məhsul satmaqda çətinlik çəkiblər. Bu il məhsuldarlıq digər illərə nisbətən az olsa da, vəziyyətlərinə hər halda şükür edirlər. Amma onu da öyrəndik ki, heç də hər fermer məhsulunu lazımınca sata bilmir. Bunun səbəbi yerli bazarda İrandan gətirilən kivilərin çox olmasıdır. Fermerlər daxili bazarın qorunmasını vacib sayırlar.
Masallıda da kivi bağları genişləndirilir. Hazırda rayonda 16 hektar kivi bağı var. Ərkivan, Mahmudavar, Boradigah fermerləri daha çox kivi istehsal ediblər. Ötən mövsümdə yığılan 30 tondan artıq məhsul bazar və marketlərə satılıb. (“Xalq qəzeti)
