Nazirlər Kabineti satışı əlavə dəyər vergisindən azad olunan yem və yem əlavələrinin siyahısını təsdiqləyib.
Eləcə də bax: Azərbaycana idxal edilən heyvan yemləri gömrük rüsumundan - AZAD OLUNDU - SİYAHI
FED.az-ın məlumatına görə, Nazirlər Kabinetindən bildirilib ki, qərar 72 növdə yem və yem əlavələrini əhatə edir. «qərarın qəbul edilməsi hesabına yem və yem əlavələrinin təsnifatı ilə bağlı hüquqi baza yaradılmış oldu. Bu hüquqi bazanın yaranması ölkədə yem məhsulları bazarının inkişafı baxımından mühüm əhəmiyyət kəsb edir.
Belə ki, 72 növdə yem və yem əlavələrinin istehsalı və satışı ilə məşğul olan biznes subyektlərinə münasibətdə vergi inzibatçılığı asanlaşdırılmış oldu.
Bununla da çoxsaylı bazar subyektləri 72 növdə məhsulun (yem və yem əlavələrinin) istehsalı və satışı üzrə tətbiq olunan vergi güzəştlərindən bəhrələnmiş olur»-deyə hökumətdən bu qərarla bağlı şərhdə bildirilir.
Xatırladaq ki, həmçinin 2022-ci ilin may ayından yem və yem əlavələrinin idxalına görə də rüsum tətbiq edilmir.
Bütün bunlar heyvandarlıqda və quşçuluqda istehsal xərclərinin sabitləşməsi baxımından əhəmiyyətli təsirə malikdir.
Məlumat üçün bildirək ki, yem xərclərinin məhsulun maya dəyərində payı quşçuluq məhsullarının (quş əti və yumurta) istehsalı üzrə 70%-ə yaxın, mal əti və süd istehsalı üzrə isə 70%-dən çox təşkil edir.
Beləliklə:
- Yem və yem əlavələrinin təsnifatı ilə bağlı hüquqi baza yaradılır;
- Bu sahədə vergi inzibatçılığı asanlaşdırılır;
- Siyahıya daxil edilmiş yem və yem əlavələrinin satışı ƏDV-dən azad olunur;
- Yem və yem əlavələrinin idxalına görə rüsum tətbiq edilmir.
