Yaponiyanın “Tet İnternational Development” şirkətinin törəmə müəssisəsi olan “Zaqatala AGRO İndustry” MMC-nin tütünqurutma məntəqəsində 2021-ci ildə 671 ton quru tütün istehsal edilib. Rusiya şirkətləri ilə bağlanmış müqaviləyə əsasən ötən ilin sonunadək bu ölkənin bazarlarına 187 ton quru tütün ixrac olunub və proses cari ildə də davam etdiriləcək.
Gələn ildən pambıq, tütün və şəkər çuğunduru üçün subsidiyalar məhsula görə - HESABLANACAQ
FED.az biznes və maliyyə xəbərləri portalı xəbər verir ki, bu barədə “Zaqatala AGRO İndustry” MMC-dən məlumat verilib.
Qeyd edək ki, “Tet İnternational Development” şirkəti Azərbaycanda 3 ildir ki, fəaliyyət göstərir. Əsasən kənd təsərrüfatı sahəsinə sərmayələr qoyan şirkət ölkəmizdə tütünçülüyün inkişafı ilə bağlı bir sıra layihələr həyata keçirir. Hazırda Azərbaycanda şirkətin 4 tütünqurutma müəssisəsi işləyir. Bu müəssisələr Oğuz, Tovuz, Şəki və Zaqatala rayonlarında yerləşir. Şirkətin törəmə müəssisəsi olan “Zaqatala AGRO İndustry” MMC-nin tütünqurutma məntəqəsi bu müəssisələr içərisində ən böyüyüdür.
Şirkət tərəfindən Zaqatala rayonunda emal müəssisəsinin tikintisinə 2021-ci ilin yanvarında başlanılıb və iyulda istifadəyə verilib. Məntəqədə 120 tütünqurutma kamerası quraşdırılıb. Tütün istehsalı ilə bağlı ötən il Zaqatala, Qax və Şəki rayonlarında 54 fermerlə müqavilə bağlanılıb, onlara şitil yetişdirmək üçün pulsuz toxum verilib. Eyni zamanda, fermerləri tütün şitilləri ilə təmin etmək üçün məntəqənin özündə 48 ədəd istixana quraşdırılıb.
Məhdud Məsuliyyətli Cəmiyyətdən verilən məlumata görə, ötən il müəssisə tərəfindən Zaqatala rayonunda 300 hektar, Qaxda 365 hektar, Şəkidə 35 hektar olmaqla, ümumilikdə, 700 hektar sahədə “Virciniya botaniki” növlü tütün əkilib. Mövsüm ərzində emal məntəqəsinə istehsalçılardan 5 min 388 tonadək yaşıl tütün kütləsi daxil olub.
2022-ci ildə “Zaqatala AGRO İndustry” MMC tərəfindən Zaqatala və Qax rayonlarında 600 hektaradək sahədə “Virciniya botaniki” növlü tütün əkilməsi proqnozlaşdırılır.
