Batumidə mənzil kirayəsinin qiyməti il ərzində üç dəfə artıb.
Eləcə də bax: Gürcüstanda daşınmaz əmlak satışları - KƏSKİN ARTIB
FED.az xəbər verir ki, bunu "Mardi Holding" tikinti şirkətinin rəhbəri Natia Sirabidze müsahibəsində bildirib
Onun sözlərinə görə, hazırda şəhərin mərkəzində bir və ya iki otaqlı mənzilin kirayəsi 600 dollara başa gəlir, baxmayaraq ki, 2021-ci ilin sentyabrında qiymətlər 200 dolları keçmirdi.
“Sentyabrda, bir qayda olaraq, kirayə qiymətləri azalsa da, bu il avqust ayı səviyyəsində qalıb. Ötən illə müqayisədə Batumidə kirayə mənzillərin qiyməti üç dəfə artıb”, - Sirabidze bildirib.
O, bazar vəziyyətini iki amillə izah edir: Rusiya Federasiyasından gələnlərin sayının artması, həmçinin pandemiya səbəbindən ötən il distant təhsil almış əcnəbi tələbələrin Batumiyə qayıtması.
Mənzillərin qiymətinə gəlincə, Sirabidzenin sözlərinə görə, qiymətlər ən azı 50% artıb. Keçən il ikinci zolaqda kvadrat metrin qiyməti 500-600 dollar idisə, indi 900 dollara qalxıb.
Qiymət artımına bir tərəfdən tələbat, digər tərəfdən isə tikinti materiallarının bahalaşması səbəb olub”, - Sirabidze bildirib.
Tbilisidə də mənzillərin kirayəsi və alışı qiymətləri artıb
"TBC Capital" tədqiqat təşkilatının məlumatına görə, Tbilisidə daşınmaz əmlakın kirayəsi və alışı bahalaşıb.
Təşkilatın məlumatına görə, 2022-ci ilin avqustunda kirayə haqqı keçən illə müqayisədə 79%, bu ilin iyul ayı ilə müqayisədə isə 8% artıb. 40 kv.m mənzilin kirayəsi üçün orta qiymət Tbilisidə 356 ABŞ dolları təşkil edib.
Avqustda 737 yeni tikilmiş mənzil satılıb ki, bu da 2022-ci ilin eyni ayı ilə müqayisədə 18%, iyul ayı ilə müqayisədə isə 39,6% çoxdur. Mənzilin alış qiymətləri də artıb - il ərzində 32,1%, ay ərzində isə 19%. Yeni tikililərdə kvadratmetrin orta qiyməti 1221 dollar olub.
Gürcüstanda daşınmaz əmlakın qiyməti artmaqda davam edəcəkmi?
Tikinti materiallarının qiymətlərinin sabitləşməsinə baxmayaraq, inşaatçılar hələ də ilin sonuna qədər əmlak qiymətlərinin artacağını proqnozlaşdırırlar.
"Arsi" tikinti şirkətinin baş direktoru Beso Ortoidzenin sözlərinə görə, qiymətlər ən azı 5% də artacaq:
"Şirkətlər tikintinin bahalaşmasını qiymətdə dərhal əks etdirə bilməyiblər - orta hesabla qiymətlər təxminən 10-15% artıb və bu, normal fəaliyyət üçün kifayət deyil. Tikinti şirkətlərinin gəlirliliyini bərpa etməsi üçün ilin sonuna kimi qiymətlər ən azı 5% artacaq”.
“Bu gün Tbilisinin heç bir rayonunda daşınmaz əmlakın orta qiyməti nə az, nə çox 650-700 dollardır. Əgər əvvəllər şəhərin kənarında 500 dollara 1 kvadrat metr almaq mümkün idisə, bu gün bu, artıq real deyil”, - deyə “Arsi” tikinti şirkətinin baş direktoru bildirib.
Onun sözlərinə görə, bahalaşmaya baxmayaraq, daşınmaz əmlaka tələbat yüksək olaraq qalır.
“Üçüncü rüb artıq başa çatıb və deyə bilərik ki, tələb il ərzində artıb. Avqustda da tələbat azalmayıb. Bir neçə amil tələbatın artmasına səbəb olub - xüsusən də gözləniləndən daha güclü olan COVID-dan sonrakı iqtisadi artım”, - Beso Ortoidze bildirib. (Marja)
