Dünya Bankının Əmək və Əhalinin Sosial Müdafiəsi Nazirliyi ilə əməkdaşlıqda həyata keçirdiyi “Azərbaycanda Məşğulluğa Dəstək” layihəsi üzrə missiya ilə görüşdə layihənin icrası işlərinin uğurla davam etdiyi bildirilib.
Dünya Bankı: “2050-ci ildə Azərbaycanda adambaşına ÜDM $10 mini ötə bilər”
Nazirlikdən FED.az-a verilən xəbərə görə, əmək və əhalinin sosial müdafiəsi naziri Sahil Babayev özünüməşğulluq proqramının genişləndirilməsində “Azərbaycanda Məşğulluğa Dəstək Layihəsi”nin əhəmiyyətini qeyd edib. 2020-2025-ci illəri əhatə edən layihənin 22 min işsiz şəxsin özünüməşğulluq proqramı çərçivəsində kiçik ailə təsərrüfatının yaradılması, eləcə də məşğulluq xidmətləri və proqramlarının təkmilləşdirilməsinə dəstək verilməsi məqsədi daşıdığı vurğulanıb.
Qeyd olunub ki, layihə üzrə artıq 8 minə yaxın şəxs biznes təlimlərə cəlb olunub ki, onlardan 700 nəfərdən çoxu şəhid ailələri üzvləri və müharibə iştirakçılarıdır. Həmçinin 2400-dən çox qadın bu təlimlərdə iştirak edib.
Layihə üzrə artıq 5042 şəxsə müdafiə etdikləri biznes planlara uyğun aktivlər verilməklə onlar üçün istehsal və xidmət sahələri üzrə kiçik bizneslər qurulub. Hazırda da bu proses davam edir. Layihədə gənclərə də üstünlük verilir və 2,1 mindən çox gənc layihə üzrə təlimlərə cəlb olunub. Görüşdə Dünya Bankının sosial müdafiə məsələləri üzrə baş mütəxəssisi Mirey Ovadiya, program rəhbəri Ahmet Levent Yener və missiyanın digər üzvləri ilə layihənin icrası işləri və bu sahədə görüləcək işlər müzakirə olunub.
Layihənin “Məşğulluq xidmətləri və proqramlarının gücləndirilməsi komponenti” çərçivəsində aparılmış işlər nəzərdən keçirilib. Sosial xidmətlər, sosial yardım, əlilliyin qiymətləndirilməsi sistemlərinin təkmilləşdirilməsi, müvafiq sorğuların keçirilməsi və s. sahələrdə həyata keçirilən əməkdaşlığa və gələcək birgə işlərə dair fikir mübadiləsi aparılıb.
