Sığorta bazarının kapitallaşması hələ də çox azdır və beləliklə, sığorta şirkətlərinin risk qəbuletmə imkanlarını məhdudlaşdıran amildir.
"Azərbaycan sığorta bazarının ÜDM payı çox aşağıdır"
FED.az xəbər verir ki, bu barədə "Sığorta mübahisələrinin uğurlu həlli yolları" adlı konfransda çıxışı zamanı Sosial Tədqiqatlar Mərkəzinin rəhbəri Zahid Oruc deyib.
O bildirib ki, hazırda ölkə üzrə bütün sığortaçıların nizamnamə kapitalının məcmu məbləği təxminən 310 milyon manat civarındadır. Bu məbləğ, orta səviyyəli bir Avropa sığortaçısının kapitalı ilə müqayisədə kifayət qədər aşağıdır.
Zahid Oruc əlavə edib ki, kapitallaşma ilə yanaşı, sığorta ehtiyatlarının yaradılması və öz resurslarını sərbəst investisiyaya yönəltməsi vacibdir:"Sığorta ehtiyatları ölkə iqtisadiyyatı üçün mühüm kredit resursu rolunu oynaya bilər. Lakin bu sahədə şirkətlər məhdud çərçivədə davranır. Əksər sığortaçılar bağlı olduqları banklara maliyyə resurslarını yerləşdirirlər. Bununla bağlı “Beynəlxalq sığorta”, “Standart sığorta” kimi şirkətlərin acı təcrübəsi var. Belə ki, “Azərbaycan Beynəlxalq Bankı”ndakı məlum hadisələr, “Standart” Bankın bağlanması onlara bağlı olan, resurslarını idarə edən sığorta şirkətləri üçün də ciddi risklər yaratdı". (Apa)
