Azərbaycanın həyat sığortası bazarının gənc iştirakçılarından olan «Meqa Həyat Sığorta» şirkəti 2022-ci ili uğurlu nəticələrlə başa vurub.
FED.az xəbər verir ki, iri şirkətlərin uzunmüddətdir ki, mövcud olduğu həyat sığortası bazarında şirkət yerini möhkəmlətməyə və mənfəətə çıxmağa nail olub.
Hesabata görə, 2022-ci ildə «Meqa Həyat Sığorta»nın cəmi gəlirləri 2 milyon 230 min manat təşkil edib. Ötən il şirkət 2,4 milyon manat sığorta haqqı toplayıb, eləcə də investisiya gəlirləri üzrə 1,18 milyon gəlir əldə edib.
Şirkətin cəmi xərcləri isə 1,51 milyon manat olub. Bunun 1,3 milyon manata işləri aparılması xərci, 127 min manat isə təkrar sığortaya yönəldilən sığorta haqlarıdır.
Nəticədə şirkətin ilin sonuna maliyyə mənfəəti 717 min manat təşkil edib, bundan 143 min manat mənfəət vergisi ödəniləndən sonra «Meqa Həyat Sığorta» 2022-ci ili 574 min manat xalis mənfəətlə tamamlayıb.
2022-ci ildə «Meqa Həyat Sığorta»nın aktivləri 7,5 milyon manat və ya 60%-dən çox artaraq 12,1 milyon manatdan 19,6 milyon manata yüksəlib.
Bu dövrdə şirkət qiypmətli kağızlara yatırımı kəskin artıraraqa 33 min manatdan 14 milyon manata çatdırıb. Bunun 12 milyon manatı dövlət istiqrazlarıdır.
Şirkətin öhdəlikləri 16 dəfə artaraq 475 min manatdan 7 527 min manata yüksəlib. Cəmi kapital isə 12,1 milyon manat təşkil edib.
