Azərbaycanda sentyabrın 1-dən iri ticarət mərkəzlərinə, mehmanxanalara giriş yalnız COVİD pasportu ilə olacaq.
Eləcə də bax: Brifinq başladı - Canlı Yayım
FED.az xəbər verir ki, Nazirlər Kabineti yanında Operativ Qərargahın bu gün keçirilən brifinqində Daxili İşlər Nazirliyinin Mətbuat xidmətinin şöbə rəisi Elşad Hacıyev deyib ki, insnların pasportunun olub-olmadığını yoxlamaq üçün bütün iri ticarət mərkəzlərinin qarşısına polis qoyulması nəzərdə tutulmur:
“Bütün iri ticarət mərkəzlərinin qarşısına polis qoyulması nəzərdə tutulmur. Burada beynəlxalq təcrübə əsas götürüləcək. Bu iş həmin obyektlərin sahiblərinə həvalə olunacaq. Monitorinq qrupları isə həmin ünvanlarda qəfil yoxlamalar həyata keçirəcək. Bu zaman həmin ticarət mərkəzində COVID pasportu olmadan daxil olan şəxs müəyyən edilərsə, məsuliyyət obyekt rəhbərinin üzərinə düşəcək”.
E. Hacıyev qeyd edib ki, epidemiya əleyhinə rejimin sanitar-gigiyena, karantin rejimlərinin pozulmasına görə fiziki şəxslər 200 manatdan 400 manatadək, vəzifəli şəxslər isə 4000 manatdan 5000 manatadək cərimə olunacaq: “İşin hallarına görə xətanı törədənin şəxsiyyəti nəzərə alınmaqla 1 aylıq həbs tədbiri, eləcə də hüquqi şəxslərin 5 min manatdan 11 min manatadək cərimə edilməsi nəzərdə tutulub”.
“Monitorinq həyata keçirən şəxslər mülki formada ticarət obyektlərinə daxil olacaqlar”
“Bütün ticarət obyektlərinin monitorinqini həyata keçirən şəxslər mülki və polis formasında həmin obyektlərə daxil olacaqlar”, - Elşad Hacıyev deyib.
Onun sözlərinə görə, ticarət məkəzlərində qayda pozuntusu halları aşkar olunub:
“Həmin obyekt sahibləri bilsinlər ki, onlar barələrində görülən tədbirlərdən nəticə çıxarmayıblarsa, həmin obyektin fəaliyyətinin dayandırılması və qanunvericiliklə nəzərdə tutulmuş digər ağır cəzaların verilməsi nəzərdə tutulur”.
