Böyük Britaniya bankı "Standard Chartered" 2023-cü ilin ikinci rübü üçün dərc etdiyi qlobal makro analiz hesabatında Türkiyə analizinə də yer verib.
FED.az xəbər verir ki, Bank hesabatında Türkiyənin iqtisadi artımının son təşviqlərə baxmayaraq təzyiq altında qalacağını qeyd edib.
Hesabatda qeyd olunub ki, zəlzələ, aşağı xarici tələb və qarşıdan gələn seçkilər bu il iqtisadi aktivliyin sürətini azaldıb. Bank ölkənin iqtisadi artım proqnozunu 3 faizdən 2,5 faizə endirib.
İNFLYASİYA PROQNOZU
Hesabatda son dövrlərdə azalmasına baxmayaraq 2023-cü ildə inflyasiyanın orta hesabla 55% səviyyəsində qalacağının gözlənildiyi qeyd edilib.
Həmçinin hesabatda, Ərdoğanın seçkidə qalib gəlməsi vəziyyətində Türkiyə Mərkəzi Bankının pul siyasəti faizini 2023-cü ilin ikinci rübündə 0,50 faiz bəndi azalda biləcəyi qeyd edilib.
Hesabatda hazırkı hökumətin yeni iqtisadi planı olan "Türkiyə İqtisadiyyat Modeli"nə bağlı qaldığı güman edilib. AKP hökumətinin seçkilərdən sonra iqtidarda qalması halında mövcud siyasətlərin davam edəcəyi gözlənilir.
“Seçkilər Türkiyə üçün dönüş nöqtəsi ola bilər”
14 may seçkilərinin Türkiyə üçün dönüş nöqtəsi ola biləcəyinə diqqət çəkilən hesabatda, seçkilərin xüsusilə uzun müddətdir dəyərini itirən TL üçün həlledici olacağı bildirilib.
Hesabatda deyilir: “May seçkiləri milli valyutaya əhəmiyyətli təsir göstərəcək. Bu kontekstdə biz dollar/TL-nin daha sürətli yüksələcəyini (dolların bahalaşmasını, lirənin ucuzlaşmasını - red) gözləyirik”.
2023-cü il üçün nəzərdə tutulan 56 milyard dollarlıq turizm gəlirinə əlavə olaraq, seçkidən sonra hökumətin yeni xarici maliyyə qaynaqları axtarmalı ola biləcəyi ifadə edilib.
“DOLLAR/TL-NİN 36 SƏVİYƏSİNƏ YÜKSƏLMƏSİ MÜMKÜNDÜR”
Məzənnə ilə bağlı hədəflərini açıqlayan bank, iqtidar dəyişikliyindən asılı olmayaraq məzənnənin yüksələcəyini qeyd edərək, müxalifətin qalib gələcəyi təqdirdə artımın məhdudlaşacağını bəyan edib.
“Mövcud qeyri-ənənəvi siyasətlərdən uzaqlaşma, kifayət qədər kapital axını cəlb edə bilər. Belə bir ssenaridə 2023-cü ilin sonunda dollar/TL səviyyəsini 20 lirə səviyyəsində görə bilərik.
Digər tərəfdən, mövcud siyasətlərin davam etdirilməsi ssenarisində dollar/Türk Lirəsi məzənnəsinin 2023-cü ilin sonuna kimi 36 lirəyə çata biləcəyini düşünürük". (Marja)
