İran ilə ABŞ arasında üçüncü ölkənin vasitəsilə məhkumların dəyişdirilməsi (ekstradisiya) və sanksiyaların aradan qaldırılması barədə aparılan danışıqlar öz nəticəsini verib.

Eləcə də bax: İranda inflyasiya son 27 ilin ən yüksək səviyyəsinə - ÇATIB

FED.az İran mətbuatına istinadla xəbər verir ki, İran məhkəməsi ikili vətəndaşlığı (ABŞ və İran) olan Baqer Namazi və oğlu Siamak Namazini azadlığa buraxıb. Baqer Namazi azadlığa çıxan kimi İranı tərk edib. Bunun müqabilində isə ABŞ İranın Cənubi Koreya banklarında dondurulan vəsaitinin bir qismini, yəni 7 milyard ABŞ dollarının İrana qaytarılması üçün icazə verib.

BMT Baş katibinin mətbuat katibi Stefan Düjarrik faktı təsdiq edərək bildirib ki, Baqeri Namazi azadlığa buraxılıb. Mətbuat katibi BMT-nin Baş katibi Antonio Quterreşin adından İran Prezidenti İbrahim Rəisiyə Baş katibin xahişinə diqqət göstərdiyinə görə minnətdarlığını ifadə edib.

İranın Cənubi Koreya banklarında ABŞ-ın iqtisadi sanksiyalarının nəticəsi olaraq dondurulan maliyyə aktivlərindən 7 milyardın qayıtması barədə hələlik məlumat yoxdur. İran Mərkəzi Bankından bildiriblər ki, sözügedən məbləğdəki maliyyə vəsaitinin İran banklarına köçürülməsi barəsində sifariş daxil olmayıb.

Ölkənin çətin iqtisadi vəziyyətdən çıxması üçün həmin maliyyə vəsaitinə rəsmi Tehranın böyük ehtiyacı var. (Azərtac)