"2020-ci il ərzində Mərkəzi Bankın valyuta ehtiyatları pandemiyadan irəli gələn və beynəlxalq səviyyədə irimiqyaslı monetar və fiskal stimullaşdırma ilə müşayiət olunan qlobal iqtisadi şok şəraitində idarə edilmiş və valyuta ehtiyatlarının idarə edilməsi siyasətinin əsas prioriteti vəsaitlərin təhlükəsiz və likvid şəkildə qorunub saxlanması olmuşdur".
Eləcə də bax: AMB bir hüquqi şəxsə valyuta mübadiləsi üçün lisenziya verdiyini - Açıqlayıb
FED.az xəbər verir ki, bu barədə Azərbaycan Mərkəzi Bankının bu güm açıqladığı 2020-ci il üzrə illik hesabatında bildirilir.
Hesabahda deyilir ki, valyuta ehtiyatlarının idarə olunması strategiyası və qaydalarına müvafiq olaraq Mərkəzi Bankın valyuta ehtiyatları cari fəaliyyəti təmin edən əməliyyat və yığım aləti olan 14 investisiya tranşlarına bölünmüş, hər bir tranş təyinatına uyğun idarə edilmişdir: "Bilavasitə Mərkəzi Bankın pul siyasətinin cari il ərzində dəstəklənməsinə xidmət edən əməliyyat tranşı xarici iqtisadi fəaliyyətin dominant valyutası olan ABŞ dollarında saxlanmışdır. İnvestisiya gəliri əldə etmək məqsədinə xidmət edən investisiya tranşının isə 90% ABŞ dolları, 7% avro və 3% İngiltərə funt sterlinqində saxlanılması təmin edilmişdir".
Nəticədə, hesabat dövrünün sonuna rəsmi valyuta ehtiyatlarının 90%-ni ABŞ dolları, 5%-ni avro, 2%-ni İngiltərə funt sterlinqi və 3%-ni isə SDR (BVF-in xüsusi borclanma hüquqları) təşkil etmişdir.
İdarəetmənin səmərəliliyini təmin etmək məqsədilə Mərkəzi Bankın valyuta ehtiyatları xarici ölkələrin likvid və yüksək keyfiyyətli dövlət, kvazi-dövlət və korporativ borc öhdəliklərinə investisiya edilməklə idarə edilmişdir.
İnvestisiya portfeli maliyyə alətləri və ölkələr üzrə geniş diversifikasiya olunmuş, qlobal makroiqtisadi mühitin, eləcə də xarici maliyyə bazarlarının təhlili xüsusi diqqət mərkəzində saxlanmışdır. Daxili idarəetmə ilə yanaşı, Mərkəzi Bank 2020-ci ildə valyuta ehtiyatlarının idarə edilməsində xarici menecerlərlə əməkdaşlığı davam etdirmişdir.
Xarici menecerlərin xidmətlərindən istifadə ilə investisiya portfellərinin səmərəliliyi daha da artırılmış, habelə qabaqcıl dünya təcrübəsinin daxili idarəetməyə ötürülməsi istiqamətində tədbirlər görülmüşdür. 2020-ci il ərzində Mərkəzi Bankın rəsmi valyuta ehtiyatlarının həcmi 112 mln. ABŞ dolları və ya 1.8% artaraq dövrün sonuna 6.4 mlrd. ABŞ dolları təşkil etmişdir. 2020-ci ildə valyuta aktivlərinin idarə edilməsindən 93,65 mln. ABŞ dolları gəlir əldə edilmişdir.
