Avropa Yenidənqurma və İnkişaf Bankı (AYİB) Gemza Group LLC-yə 5,6 milyon avro məbləğində kreditin ayırmasını təsdiq edib.
FED.az xəbər verir ki, kredit vəsaiti Gemza Group LLC tərəfindən üç müasir anbarın tikintisinə yönəldiləcək.
“Layihə şirkətə biznesin yeni sitiqamətində fəaliyyətini günişləndirməyə və öz gəlirlərini şaxələndirməyə imkan verəcək”, - AYİB-dən vurğulanıb.
Layihə 19,1 milyon avro həcmində qiymətləndirilir.
Bu, AYİB-in Gemza Group LLC-yə ayrıdığı sayca ikinci kreditdir. 2021-ci ilin dekabr ayında tərəflər arasında 8 milyon avro dəyərində kredit sazişi imzalanıb. Kredit vəsaitləri Gemza Group şirkətinin dövriyyə kapitalına olan tələbatının və kapital xərclərinin (CAPEX) ödənilməsinə yönəldilib.
2005-ci ildə əsası qoyulmuş Gemza Group LLC törəmə şirkətləri vasitəsilə neft-qaz sənayesi üçün fırlanan avadanlıqların (nasoslar, qapaqlar və s.) tədarükü ilə məşğul olur, ehtiyat hissələri istehsal edir, Azərbaycan, MDB ölkələri, BƏƏ və Türkiyədə belə avadanlıqların təmiri, texniki xidmət göstərilməsi və əsaslı təmiri üzrə xidmətlər təqdim edir.
Azərbaycan 1992-ci ildən AYİB-in üzvüdür. AYİB bu günədək respublikada 184 layihənin maliyyələşdirilməsinə təqribən 3,8 milyard avro ayırıb. Hazırda bankın respublika üzrə aktiv portfelinə 32 layihə daxildir və onların həyata keçirilməsi üçün 881 milyon avro ayrılıb. (İnterfaks-Azərbaycan)
