2022-ci ilin yanvar-sentyabr aylarında banklar tərəfindən nağd xarici valyutanın alqı-satqısı üzrə aparılmış əməliyyatların ümumi həcmi $3,9 milyard olub, bu da 2021-ci ilin analoji dövrünün göstəricisindən 46,9% çoxdur.

Azərbaycan Mərkəzi Bankı - Pul Siyasəti İcmalı - Yanvar-Sentyabr (2022) – TAM MƏTN

FED.az xəbər verir ki, bu barədə Mərkəzi Bankdan (AMB) məlumat verilib.

“Bunun 87,2%-ni ABŞ dolları ilə aparılmış əməliyyatlar təşkil edib”, - AMB-dən bildirilir.

I rübdə nağdsız valyuta bazarında aparılmış əməliyyatların həcmi $1,2 milyard, ikinci rübdə - $1,4 milyard, üçüncü rübdə – $1,3 milyard olub.

AMB-dən qeyd olunub ki, cari ilin birinci rübündə nağd xarici valyutanın yüksək satışı hesabına 9 ay ərzində nağd xarici valyutanın xalıs satışı 48,1% artəb. Həmçinin, aprel-sentyabr aylarında vəziyyət dəyişib və valyuta alışı satışı üstələyib.

AMB-dən vurğulanıb ki, 2022-ci ilin 9 ayı ərzində Azərbaycanın nağdsız valyuta bazarının həcmi $22,3 milyard təşkil edib (2021-ci ilin analoji dövrü ilə müqayisədə artım 16,3% - İF). “Valyuta bazarında əməliyyatlarının 84.5%-i ABŞ dolları, 15.5%-i isə digər valyutaların payına düşüb”, - AMB-dən bildirilib.

AMB-nin məlumatına görə, valyuta əməliyyatlarının 29,6%-i banklararası valyuta bazarında (BVB), 70,4%-i isə bankdaxili valyuta bazarında (BDVB) həyata keçirilib.

9 ay ərzində BVB-də əməliyyatların 99.1%-i ABŞ dollarında aparılıb. “Hesabat dövrü ərzində əməliyyatların həcmi ötən ilin analoji dövrü ilə müqayisədə 19,9% artaraq $6,6 milyarda ekvivalent olub. BVB-də valyuta əməliyyatları üzrə dövriyyə əsasən “Bloomberg” platformasında aparılan əməliyyatlar hesabına formalaşıb”, - məlumatda qeyd olunur.

BDVB-də valyuta əməliyyatlarının həcmi $15,7 milyard ekvivalentində olub (artım 14,8%) ki, bunun da 78.3%-ni ABŞ dolları ilə əməliyyatlar təşkil edib. BDVB-də valyuta əməliyyatlarının 93%-i hüquqi şəxslərlə aparılan valyuta əməliyyatlarının payına düşüb. (İntefaks-Azərbaycan)