"Azərbaycan üçün orta perspektivdə başlıca hədəf yeni iqtisadi model yaratmaqdır".
Eləcə də bax: BVF: Azərbaycan iqtisadiyyatı bu il - 2% Artacaq
FED.az xəbər verir ki, bunu Beynəlxalq Valyuta Fondunun (IMF) Azərbaycandakı missiyasının rəhbəri Natalia Tamirisa bildirib.
O, həmin modeldə iqtisadi artımda əsas pay sahibi fəal və şaxələndirilmiş özəl sektorun olacağını deyib:
“Bu məqsədlə maliyyə sektorunu və bazarları gücləndirilərək inkişaf etdirmək, dövlət müəssisələrini daha səmərəli vəziyyətə gətirmək, iqtisadiyyatı neftdən asılı vəziyyətdən xilas etmək üçün şaxələndirmək istiqamətində müvafiq islahatlar müəyyənləşdirmək vacibdir”.
Ekspertin fikrincə, orta perspektivdə vergi və büdcə siyasətinin əsas hədəfləri istehsalat infrastrukturuna, insan kapitalının inkişafına sərmayə qoymaqla gələcək nəsillər üçün neft sərvətini qorumaq arasında tarazlıq tapılmalıdır.
“Azərbaycan malik olduğu böyük maliyyə “yastıq”ları sayəsində COVID-19 pandemiyası səngiyənə, dirçəlmə başlayanadək iqtisadiyyata dövlət dəstəyini davam etdirmək üçün əlverişli vəziyyətdədir. Pandemiyaya görə xüsusi dəstək dayandırılarkən bunu tədricən etmək lazım gələcək”, – İMF rəsmisi vurğulayıb.
Ötən ilin oktyabr ayında İMF tərəfindən açıqlanmış “Dünya iqtisadiyyatının inkişaf perspektivləri” hesabatına görə, 2021-ci ildə dünya üzrə ÜDM-in artımı 2 faiz, inflyasiya səviyyəsi 3,1 faiz, məcmu dövlət borcunun həcmi isə ÜDM-in 20 faizi səviyyəsində gözlənilir.
N.Tamirisanın sözlərinə görə, aprel ayında dərc ediləcək növbəti hesabatda yenilənmiş proqnoz yer alacaq.
Xatırladaq ki, Azərbaycan 1992-ci il sentyabrın 18-dən İMF-nin üzvüdür. (Report)
