Azərbaycanda pul gəlirləri və yatırımlara görə, ölkənin ən geridə qalmış rayonları məlum olub.

Azərbaycanda adambaşına ən çox və ən az sərmayə yatırılan  rayon/şəhərlər – SİYAHI, MƏBLƏLƏR (2022)

FED.az Dövlət Statistika Komitəsinə istinadən xəbər verir ki, ölkədə 73 rayon şəhərin bir neçəsində gəlirlər və investisiya qoyuluşları minimum həddədir və ölkə üzrə orta göstəricilərdən bir neçə dəfə aşağıdır.

Ümumi investisiya məbləğinə görə - ƏN KASIB 11 RAYON

2022-ci ilin nəticələrindən məlum olur ki, ölkədə ən az pul yatırılan 11 rayon – Zərdab, Kəngərli, Saatlı, Göyçay, Ordubad, Lerik, Sədərək, Gədəbəy, Yardımlı, Şahbuz və Naftalandır.

Bu rayonlara il ərzində 1-8 mlyon manat arasında sərmayə yatırılıb. Müqayisə üçün bildirək ki, Azərbaycanda 73 rayon və şəhərdən 53-də yatırımların həcmi 20 milyon manatdan artıqdır. 43 rayonda isə 30 milyondan artıqdır.

Ümumiyyətlə, yatırımların həcminə görə «kasıb» rayonların siyahısında Naxçıvan MR-a daxil olan rayonların olması diqqəti cəlb edir, baxmayaraq ki, bu dövrdə Naxçıvan şəhərinə 1 milyard manata yaxın sərmayə yatırılıb.

Adambaşına sərmayələrə görə – ƏN KASIB 14 RAYON

Adambaşına sərmayələr baxımından ən kasıb rayonlarda vəziyyət ümumiyyətlə biabırçı şəkil alıb. DSK-nin məlumatları əsasında FED.az-ın aparığı hesablamaya görə, ölkə üzrə yatırımların adambaşına düşən orta məbləği 1 800 manatdır. Amma ayrı-ayrı rayon və şəhərlərdə bu məbləğ kəskin fərqlənir.

Belə ki, Azərbaycanda cəmi 18 şəhər və rayonda adambaşına yatırımlar 1000 manatan artıqdır. Qalan 55 rayon və şəhərdə məbləğlər daha aşağıdır. 43 rayonda adambaşına yatırımlar 500 manatdan aşağıdır. 33 rayonda isə admmbaşına yatırımlar 300 manatdan da azdır.

Azərbaycanın adambaşına düşən investisiyaların həcminə görə ən kasıb rayonlarında isə bu məbləğ ümumiyyətlə 100 manatdan da azdır.

Siyahıda yer alan 14 rayondan biri hələ də işğal altında olan Xocalı rayonudur – adambaşına 18 manat. Amma məsələn, Gədəbəy rayonunda sərmayə qoyuluşu ilə bağlı vəziyyət Xocalıdan o qədər də fərqlənmir – 31 manat. Yardımlı, Göyçay, Saatlı və Lerikdə də adambaşına illik yatırımların  həcmi 100 manatdan aşağıdır.

Əmək haqqının məbləğinə görə – ƏN KASIB 14 RAYON

2022-ci ildə Azərbaycanda orta aylıq əmək haqqı 839 manat təşkil edib.  Amma bu orta göstəricidir və yalnız Bakıda maaşların məbləği bu göstəricidən yüksək olub – 1080 manat. Qalan bölgələrdə isə maaşların həcmi ilə bağlı paytaxtla böyük fərq var və bu fərq 2 dəfədən artıqdır.

Belə ki, ölkədə Bakı şəhəri və Daşkəsəndən başqa heç bir rayonda əmək haqqı 800 manatdan yüksək deyil. 73 rayondan 60-da aylıq əmək haqları 600 manatdan aşağıdır. 4 rayonda isə maaşların həcmi 500 manatdan da aşağıdır – bunlar maaş baxımından ən kasıb rayonlardır. Belə rayonların siyahısına Qax rayonu başçılıq edir – 451 manat. Bu Azərbaycanda 2022-ci ildə qüvvədə olan minimum əmək haqqından cəmi 150 manat yüksəkdir.Balakən, Zaqatala və Xızı rayonlarında isə maaşlar 480-490 manat arasında dəyişir. Siyahıdakı digər 10 rayonda orta aylıq əmək haqqı 497-520 manat arasındadır.