İqtisadiyyat Nazirliyi yanında Kiçik və Orta Biznesin İnkişafı Agentliyi ölkə ərazisində gömrük statuslu depoların fəaliyyətə başlamasını təklif edib.
Orxan Məmmədov Azərbaycanda gömrükdəki problemləri açıqladı – SİYAHI, İŞ ADAMLARI İLƏ MÜZAKİRƏ
FED.az xəbər verir ki, təklifi qurumun İdarə Heyətinin sədri Orxan Məmmədov Bakıda keçirilən “Gömrük islahatları: çağırışlar və imkanlar” mövzusunda ictimai müzakirələrdə səsləndirib.
"KOB subyektlərinin "Yaşıl dəhliz" xidmətindən istifadəsinin daha əlçatan olması, onların buna təşviq edilməsi üçün prosedurlara yenidən baxılmasına ehtiyac var. KOB-ların gömrük xidmətlərinə çıxışının sadələşdirilməsi diqqət çəkən məsələlərdəndir: "Azərbaycanda yük daşımaları, o cümlədən tranzit daşıma prosesində hər hansı müştərinin hesabında və ya sənədlərində problem ortaya çıxdığı halda məsələ həll edilənə qədər TİR-lər yüklə bərabər gözləmə məcburiyyətində qalır, bu isə bəzən günlər və yaxud həftələrlə uzana bilər. Burada beynəlxalq təcrübəni nəzərə alaraq və nəqliyyat vasitələrinin idxal və tranzit yükləmələrində boşdayanmaların qarşısının alınması üçün ölkə ərazisində gömrük statuslu depoların fəaliyyətə başlamasını təklif etmək olar", - o deyib.
Sədr vurğulayıb ki, idxal-ixrac fəaliyyəti ilə məğul olmaq istəyən sahibkarlar bəzi hallarda prosedurlardan məlumatsız olur: "Baxmayaraq ki, həm qida təhlükəsizliyi, həm də gömrük prosedurlarının bir çox hissəsi elektronlaşdırılıb, lakin prosesin həyata keçirilməsində və aidiyyəti qurumlardan məlumatların əldə edilə bilməsindəki bəzi çətinliklər KOB-lar üçün maneələr yaradır. Təklif edirəm ki, idxal-ixrac prosedurlarının bütün mərhələləri üzrə məlumatlar açıq elektron resurslarda yerləşdirilsin, eyni zamanda sənədləşmə prosedurları sadələşdirilsin".
"KOBİA olaraq dövlət-biznes dialoqu platformasında təşkil olunmuş bugünkü forumdan gözləntilərimiz çoxdur. Düşünürük ki, müzakirələrlə öz işini davam etdirəcək bugünkü tədbir – ölkədə aparılan islahatlar və mövcud qanunvericiliyin tələbləri, onun mahiyyəti, eləcə də tənzimləyici qurumların gözləntiləri haqqında daha dolğun təsəvvürün yaranmasına fürsət yaradacaq", - O.Məmmədov əlavə edib. (Report)
