Rəqəmsal İnkişaf və Nəqliyyat Nazirliyinə məxsus "Azərpoçt" MMC 2 illik fasilədən sonra yenidən mənfəətlə işləməyə başlayıb.
FED.az xəbər verir ki, bunu şirkətin İdarə Heyətinin sədri Əfqan Cəlilov bildirib.
"Beynəlxalq maliyyə hesabatları standartlarına (IFRS) görə, "Azərpoçt" 2020-ci ili 7,7 milyon manat zərərlə bitirib. Atdığımız addımlar nəticəsində 2021-ci ildə bu zərəri 3,4 milyona manata endirə bildik. 2022-ci ilin 5 ayını isə mənfəətlə başa vurmuşuq, yəni hazırda mənfəətlə işləyən strukturuq. Çalışacığıq ki, ötən ildən başlanmış bu tendensiyanı davam etdirək", - deyə o, qeyd edib.
Sədrin bildirdiyinə görə, ilin sonuna qədər Rəqəmsal İnkişaf və Nəqliyyat Nazirliyinə məxsus "Azərpoçt" MMC-nin əməkdaşlarının maaşları artırılacaq.
"Biz zərərdən mənfəətə keçməmiş əməkhaqqı artımına baxa bilməzdik. Bundan sonra atılacaq addımlar o olacaq ki, ötən ildən başlamış müsbət trendi bu ilin sonuna qədər saxlayaq və ili müsbət nəticələrlə yekunlaşdıraq. Bu boyda strukturda maaşlara birdən baxmaq çətin olacaq. Amma ilin sonundan etibarən maaşların hissə-hissə artırılması nəzərdə tutulur. Eyni zamanda maaşlara standart yanaşma olmayacaq ki, konkret olaraq bu məbləğin üzərindən qalxmalıdır. Bu düzgün deyil və rəqabətlik prinsipi olmalıdır. Elə şöbələr var ki, orada gün ərzində 3 nəfər gəlir, elə şöbələr var daim növbələr olur. Bu zaman bir əməliyyatçı kifayət üədər iş yükü götürür. Buna biz "transaction bonus" deyirik. Yəni bir işçiyə düşən əməliyyatların sayına görə paylaşdıracağıq və təbii ki, müsbət göstəricilələl işləyən filial və şöbələrdə bu əməkhaqqıya müsbət təsir göstrəcək", - deyə Əfqan Cəlilov bildirib. (Report)
