Bakı Şəhər İcra Hakimiyyətinin (BŞİH) keçmiş Aparat rəhbəri Rasim Quliyevin cinayət işi üzrə məhkəmə prosesi davam etdirilib.
Eləcə də bax: Bakının sabiq baş memarı məhkəmədə aqressiv - Cavab Verdi
FED.az xəbər verir ki, bu gün Bakı Ağır Cinayətlər Məhkəməsində hakim Faiq Qəniyevin sədrliyi ilə keçirilən prosesdə şahid qismində "FF-2011" MTK-nın təsisçisi Tamella İbrahimova ifadəsini davam etdirib.
T. İbrahimova ifadəsində deyib ki, tikinti aparılarkən Şəhərsalma və Arxitektura Komitəsindən ona hər hansı qeyri-qanuni fəaliyyət barədə heç nə deyilməyib: "Bir nəfər mənə niyə demədi ki, bina belə tikilməlidir? Elə yazırlar ki, guya Dilarə Əliyeva-145-i mən sökmüşəm. Orda cəmi iki ev var idi. 63 yaşında qadını indi çağırmısız bura. Bina tikənlər hamısı korrupsionerdir? Belə çıxır ki, Hacıbala Abutalıbov düzgün işləməyib də... İstəyir Hacıbala Abutalıbov qol çəksin, istəyir Eldar Əzizov çəksin, mənə nə dəxli var? Mənim burda günahım nədir? Bir daha deyirəm mənə Rasim Quliyevin sənədi lazım deyildi".
Prokurorun suallarını cavablandıran şahid, Dilarə Əliyeva küçəsində söküntü işlərini Bakı Şəhər İcra Hakimiyyətinin həyata keçirdiyini, şirkətin isə pul verdiyini deyib: "Pulu nağd şəkildə icranın söküntü işlərini aparan şəxsinə ödəyirdik. Mənə bir dövlət məmuru dedi ki, sənin bu işdə günahın ancaq belə bir yerə girməyindir. 11 il adama əziyyət verərlər?”
Proses oktyabrın 18-də davam etdiriləcək.
Qeyd edək ki, Baş prokurorluğun məlumatına görə, paytaxtın Nəsimi rayonu, Dilarə Əliyeva küçəsi 141 ünvanında yerləşən yaşayış binalarının, habelə yerli əhəmiyyətli mədəniyyət abidəsi kimi dövlət tərəfindən mühafizə olunan yaşayış evinin sökülməsi və yeni yaşayış binalarının tikintisinə dair “FF-2011” Mənzil Tikinti Kooperativinə qanunsuz icazə verilməsi faktı ilə bağlı Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin müvafiq maddələri ilə cinayət işi başlanmaqla istintaqı aparılır.
Aparılmış istintaqla Bakı şəhər İcra Hakimiyyəti başçısının müavini vəzifəsi üzrə səlahiyyətlərinin icrası həvalə edilmiş BŞİH başçısının Aparat rəhbəri vəzifəsində işləmiş Quliyev Rasim Vaqif oğlunun təşkilati-sərəncamverici funksiyaları yerinə yetirən vəzifəli şəxs kimi qanunsuz üstünlük əldə etmək məqsədilə BŞİH başçısının Nəsimi rayonu ərazisində ofis və yaşayış binalarının tikilməsinə dair 31 may 2018-ci il tarixli 346 nömrəli sərəncamını şəxsən imzalamasına, bununla da sözügedən MTK-nın həmin ərazidə 1893-cü ildə inşa edilmiş yerli əhəmiyyətli tarix və mədəniyyət abidəsi kimi dövlət tərəfindən mühafizə olunan yaşayış evinin olmasını nəzərə almadan ayrı-ayrı fiziki şəxslərə məxsus olan mənzillərin, yaşayış və qeyri-yaşayış sahələrinin qanunsuz olaraq söküntüsünə başlamasına, habelə tikinti və söküntü işlərinin aparılmasının digər əsas şərtlərinin pozulmasına səbəb olmasına əsaslı şübhələr müəyyən olunub.
Qeyd edilənlər nəzərə alınmaqla, Rasim Quliyevə Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 314-2.3-cü (qanunla müəyyən olunmuş qaydaları pozmaqla tikinti və ya quraşdırma işlərinin aparılmasına icazə vermə ağır nəticələrə səbəb olduqda) maddələri ilə ittiham elan edilmiş və barəsində məhkəmənin qərarı ilə həbs qətimkan tədbiri seçilib. (Apa)
