Mingəçevirdə dələduzluq yolu ilə vətəndaşların 30 min manata yaxın pulunu mənimsəyən qadın saxlanılıb.
Eləcə də bax: Dünən həbs edilən məmurla bağlı - RƏSMİ AÇIQLAMA
DİN Mətbuat Xidmətinin Şəki regional qrupundan FED.az-a verilən məlumata görə, vətəndaşlardan daxil olmuş müraciətlər əsasında Baş Cinayət Axtarış İdarəsi və Mingəçevir Şəhər Polis Şöbəsinin əməkdaşlarının birgə əməliyyat-axtarış tədbirləri keçirib. Nəticədə dələduzluq yolu ilə insanların etibarından sui-istifadə edərək onlara külli miqdarda ziyan vuran Bakı şəhər sakini Şəlalə İsmayılova saxlanılıb.
Məlum olub ki, Şəlalə İsmayılova işə düzəltmə, sosial yardım və pensiya təyin etdirmə vədləri ilə ümumilikdə 10 nəfəri aldadaraq onların 30 000 manata yaxın pulunu mənimsəyib. Saxlanılan şəxs əməlini etiraf edib və təqsirləndirilən şəxs qismində istintaqa cəlb olunub.
Faktla bağlı cinayət işi başlanılıb. Şəlalə İsmayılovanın respublikanın digər şəhər və rayonlarında da analoji cinayətlər törətdiyi istisna olunmur. Onun əməllərindən zərərçəkən başqa vətəndaşlar olarsa, polisə müraciət edə bilərlər.
