Fövqəladə Hallar Nazirliyi (FHN) Bakının Yasamal rayonunda "Sovetski" adlanan ərazisində binada baş vermiş yanğınla bağlı məlumat yayıb.
FED.az-ın FHN-in saytına istinadən verdiyi xəbərə görə, Bakının Yasamal rayonunda vətəndaşlara məxsus üçmərtəbəli taxta konstruksiyalardan ibarət yaşayış binasının 4 mənzili 118 m² sahədə yanıb.
Yanğın zamanı 1969-cu il təvəllüdlü Liliya Mixalovna Xazibovanın yanmış meyiti aşkar olunub və 3-cü mərtəbənin eyvanından 2 nəfər yanğınsöndürənlər tərəfindən xilas edilərək təhlükəsiz əraziyə təxliyə olunub. Mənzillər yanğından mühafizə olunub.
Nazirliyin Xüsusi Riskli Xilasetmə Xidmətinin xilasedicilər hadisə yerinə cəlb olunaraq L.M.Xazibovanın meyitini çıxararaq aidiyyəti üzrə təhvil verib.
18:52
“Sovetski”də baş verən yanğında bir qadın ölüb, yanğın lokallaşdırılıb.
Yanğının tam söndürülməsi üçün tədbirlər davam etdirilir.
18:24
“Sovetski”də baş verən yanğında bir qadın tüstüdən zəhərlənib.
FED.az xəbər verir ki, APA-nın hadisə yerində olan əməkdaşının verdiyi məlumata görə, yanğın hadisəsi Yasamal rayonu, Həzi Aslanov küçəsində yerləşən üçmərtəbəli yaşayış binasında qeydə alınıb.
Yanğın binadakı mənzillərdən ikisini əhatə edib. Hadisə yerində olan təcilli tibbi yardım briqadasının həkimləri tüstüdən zəhərlənən qadına ilkin tibbi yardım göstəriblər. Qadının vəziyyəti sabitləşib.
Yanğının söndürülməsi istiqamətində tədbirlər davam etdirilir.
18:07
Bakıda Sovetski kimi tanınan ərazidə bir neçə ev yanır.
Fövqəladə Hallar Nazirliyinin Dövlət Yanğından Mühafizə Xidmətindən bildiriblər ki, yanğın Akademik Milli Dram teatrın arxasında yerləşən binada baş verib. Hava şəraiti ilə əlaqədar alov qonşu mənzillərə keçməyə başlayıb.
Əraziyə FHN-in 10 yanğın söndürən maşını və onlarla canlı qüvvəsi cəlb edilib. Alovun qarşısının alınması istiqamətində iş aparılır.
